Mizo Territorial Army lakna kalpui mekah January 18, 2026-ah Written Exam nei dawn

Mizo Territorial Army lak hna chu tluang taka kalpui mek a ni a, kumthar January ni 18-ah Written Exam buatsaih a nih dawn thu Territorial Army, Aizawl Company Officer-in-Charge Lt. Col. Goldi Bora chuan a sawi.

Inrinni-a a Pisa-a thuthar thehdarhtute a kawmna ah Lt. Col. Goldi Bora chuan Mizo Territorial Army lak tur atan mi 2700 chuangin hming an pek thu leh heng zinga tam takin Physical leh Medical Test paltlangin Written Exam an hmachhawn dawn thu a sawi a. A zat chiah hi an lakkhawm mek thu sawiin, chiang zawka an tarlan thuai theih a beisei thu a sawi a. Territorial Army lak hna kalpui mek chu a felfai thu leh an hotute pawh an lawm thu a sawi a ni. 

Lt. Col. Goldi Bora chuan an hna lak mek chu thalai ten an hriat theih nan Mizoram chhunga mi chi hrang hrangin a thehlar lamah tan an lak nasat thu leh lawmawm a tih thu a sawi a. Mizo mipuite tanrualna ah lawmthu sawiin, hna lak kawngah pawh harsatna liantham han sawi tur a awm loh thu leh a felfai thu a sawi a. Mizo hmeichhia tam takin an dil ve chu lawmawm a tih thu a sawi bawk a ni. 

Hei bakah hian Lt. Col. Goldi Bora chuan Territorial Army hna lak mekah Mizoram Youth Commission (MYC) in Written Exam hmachhawn turte tan Crash Course an siam chu lawmawm a tih thu leh an mamawh ang Resource pawh an theih anga an pek dawn thu a sawi a. Hna lak ringawt an buaipui loh thu leh Aizawl-a an rawn luh tirh atangin hmun hrang hrangah vantlang tana thil tha tiin Outreach hun hrang hrang 27 lai an huaihawt tawh thu a sawi bawk.