Krismas leh kumthar hunpui mipui ten him leh thlamuang taka an hman theih nan hmalak a ni

Kan hma lawka Krismas leh Kumthar hunpui lo thleng tur mipui ten him leh thlamuang taka an hman theih nan nimin khan Serchhip-a District Bawrhsap Paul L. Khuma hovin sawrkar thuneitute leh tlawmngai pawl aiawhte an thukhawm.
He thutkhawm Serchhip DC Meeting Hall a neih ah hian Bawrhsap Paul L. Khuma chuan Krismas leh Kumthar hunpuiah mihring rilru a sahawk thin tih sawiin, pawisawi lo vanduaina leh thil thalo a thlen theih avangin mipui himna tur leh pawikhawihna a thlen loh nan engtianga hmalak tur nge tih ngaihtuah a tul thu a sawi a. He hunah hian khawtlang hruaitute, YMA te leh sawrkar tanhona a pawimawhzia sawiin, Dan bawhchhiatna a thleng a nih chuan thuneitute hnena thlen thin turin mipuite a sawm a. Heng thil hi ‘thenawmte hekna’ a ni lo tih sawiin, pawi lian zawk a thlen lohna tura a hun taka report chu khua leh tui tha nihna a nih zawk thu a sawi a ni.

Krismas leh Kumthar vuakvetah hian Magistrate Duty te, Police Duty te, Excise Department te leh YMA ten khawlai an fang thin dawn a. Thil duhawmlo thleng a awm palha rang taka koh theih tur Police Quick Response Team siam a ni dawn a. Khawtlang hruaitute leh Police tanghoin duty an neih mek pawh chhunzawm zel nise an ti a. Serchhip Additional SP H. Lalduata chuan an inbuatsaihna te sawiin, ngawrh taka an duty tur thu leh Beat Post siam belh bakah Help Desk hun an tum thu a sawi a. Khawtlang hruaitute nena tanghoa hma an lak tur thu a sawi bawk.

Helmet khum loa lirthei ke pahnih nei khalh te leh kumtling lo a lirthei khalh chungchang pawh sawilan a ni a. Kumtling lo lirthei khalh chu Dan angin Rs.5000/- chawitira hrem theih a nih bakah Section 199 A MV Act angin Motor neitu emaw, a nu leh pa emaw chu Rs.25000/- chawitir a hrem tel theih a ni tih tarlan a ni a. Proton vuah, 2 Wheeler ring taka khalh thin te pawh dan anga hrem theih an ni a. Traffic Police te chuan Vahan kaltlangin lirthei number hmangin heng dan bawhchhetute hi an umzui dawn a ni.