KVK Serchhip District-ah World Soil Day hman a ni

Nimin December 5, 2025 kha ‘World Soil Day’ niin KVK Serchhip District, North Vanlaiphai-ah he ni pual hian hun hman a ni.
KVK Training Hall-a ‘World Soil Day’ hman hi North Vanlaiphai SDO (Civil) leh East Lungdar BDO, Dr. Peter Malsawmtluanga chuan khuallian nia hmanpuiin leilung pawimawhzia hrang hrang a tarlang a, thilnung ang maia enkawl tur a nih thu sawiin, uluk taka kan enkawl chuan kan tan tha takin hna an thawk thin tih a sawi a. KVK North Vanlaiphai-a Senior Scientist & Head, Dr. T. Vanlalngurzauva pawhin he hun an hman chhan te sawiin, sik leh sa danglam zel hian thlai ah harsatna tam tak a thlen thu a sawi a, chung harsatna sukiang tur chuan loneitute chu KVK a mithiamte hmang tangkai turin a sawm bawk.

Nimin-a World Soil Day puala hun hman hi KVK North Vanlaiphai-a SMS (Animal Science) Dr. C. Lalremruata chuan kaihruaiin loneitute hnenah Soil Health Card semchhuah nghal a ni a, he ni thupui ‘Healthy Soils for Healthy Cities’ tih hmangin Mary Lalfakzuali, SMS (Soil Science) chuan leilung enkawl that a pawimahzia a sawi a. Training Sessuion neih chhunzawm niin KVK North Vanlaiphai-a SMS (Soil Science) Mary Lalfakzuali leh Farm Manager, Prakash Thapa te chuan he huna tel loneitute chu leilung enkawl that pawimawhna leh a enkawl dan te an zirtir a. Hemi hnu hian Natural Farming chungchang a taka inzirtirna neiin hun an hmang bawk a ni.