Dan anga ngaihtuah tum a ni

Tunhnaia Serchhip-a Vawksa man bithliah thar chu zawm lo an awm nia hriat a ni a, an chungthu chu Dan anga ngaihtuah tum a ni.
Serchhip khawpui chhunga vawksa man (rate) bithliah bawhchhiaa a manto-a lo zuarte chungchang ngaihtuahin nimin khan Serchhip DC Meeting Hall-ah Bawrhsap Paul L. Khuma hovin thutkhawm neih a ni a, he hunah hian Nov. 28, 2025-a Serchhip District Level Committee (DLC) on Fixation of Price of Meat, Vegetables and Fruits thukhawm chuan thilman sang zel ngaihtuahin Vawksa man chu kumin Dec. ni 13 atangin Serchhip khawpui (Town) chhungah kg-ah Rs. 450 ni tura an rel angin Dec. ni 13, 2025 atangin Serchhip Town chhungah Vawksa hi kg ah Rs. 450 hisapa zawrh tawh tur a nih thu leh hemi hma zawng hian rate ding lai Rs. 400 hi hman chhunzawm tur a nih thu tarlan a ni a. Serchhip District chhung khaw dangah chuan Vawksa man hi thuneituten an tihdanglam hma chu kg ah cheng 400 a ni chhunzawm zel dawn tih tarlan a ni bawk.

Mimal emaw pawlho in emaw, Vawksa man an duhzat bithliah chu The Mizoram Market (Regulation and Facilitation) Act, 2022 bawhchhiatna a nih avangin hrem theih an ni tih he hunah hian tarlan niin Pawisafai Rs. 1000/- thleng chawitir emaw, thla thum (3) lung In tan emaw, a pahnih emaw; thlai/sa zawrhna seat hloh emaw; thil zawrh lai laksak emaw-a hrem theih an nih thu tarlan niin Sa, thlai leh thei zawrhna rate tihdanglam duhte chuan khawtlang hruaitute kaltlangin thuneitute hnenah thlen tur a nih thu tarlan a ni bawk a. The Mizoram Market (Regulation and Facilitation) Act, 2022 bawhchhia mi thenkhat an awm tih hriat niin heng mite chungah hian dan anga action lak a ni dawn a, thuneituten an chungchang thu hi Dan in a sawi angin an ngaihtuah dawn tih tarlan a ni.

Meeting chuan dan kalha mimal emaw, pawlho in thil man tisang an lo awm thin chu pawi an tih thu sawiin, hetiang thil thleng hria an awm a nih chuan dan leh thupek kengkawhtute hnena thlen thin turin an ngen bawk a ni.