India rampum School Quiz Final-ah Mizoram School tling

India ram puma School zirlai naupang te pual Quiz Competition Final neih turah Mizoram atangin Mount Carmel School, Chaltlang leh La Montessori School, Mission Veng te chu tel turin an tling.

Food4Thought Foundation leh Monocept ten an buatsaih India rampum a School zirlai naupang te pual Quiz Competition Reading Decathlon Final hi January 17, 2026-ah neih a ni dawn a, he inelna ah hian First Round chu August 22, 2025 khan MYC hmalaknain Online mode hmangin MYC Conference Room-ah buatsaih a ni a. Hetah hian School pali (4) telin he Round-ah hian North East aiawh tur thlan an ni a. North East aiawh tur hian Mount Carmel School leh La Montessori te hi thlan an ni a. November 29, 2025 khan Madhya Pradesh-a Indore-ah Regional Round chu paltlang lehin tunah hian January 17, 2026-a National Round (Final) intihsiakna hmachhawn turin Mount Carmel School leh La Montessori School te hi tlingin an inbuatsaih mek a ni.

Indore-a Regional Round intihsiakna a an kalna senso hi MYC chuan sum leh pai a tum sak bakah MYC Office-ah MYC Chairman Malsawmzuala Ralte chuan briefing a neihpui a, hetiang inelna lian tham, India ram pum huap Quiz Competition-a Final Round thleng thei School kan nei chu MYC ang pawhin an lawmin an chhuang hle tih a sawi a ni.