Tui leak report tha te PHED in an chawimawi

Public Health Engineering (PHE) Department-in ‘Tui Leak Report-na App’ an buatsaih hmang tha zual te chawimawina hun nimin khan buatsaihin he hun hi PHE Minister Prof. Lalnilawma chuan a hmanpui a ni.

PHE E-in-C Office Conference Hall-a nimin-a he hun buatsaih ah hian PHE Minister Prof. Lalnilawma chuan mipui leh Department thawhhona ropui a tih thu sawiin, chawimawina dawngtute thahnemngaihna ah lawmthu a sawi a. Tui Leak Report-na App chu a vil ve reng thu sawiin, he app kaltlang hian tui luangral tur litre tam tak an ven theih thu leh, Department hmalakna tur chin chu a theih anga ranga an siamthat zel thu a sawi a. Cluster atanga mimal connection leak a lo awm erawh chuan a neitute siamthat tur a nih thu leh an siam vat loh chuan connection tihtawpsak pawh Dan-in a phal thu a sawi a ni.

PHE Minister chuan an Department hmalakna te tarlangin, an mutan lian ber pakhat – Alternate Gravity Water Supply Scheme of Aizawl hnuaia Hualtu atanga tui lakna pawh harsatna karah hlawhtlinpuiin, Muallungthu pawh an commission tawh thu leh Mualpui-ah tui an tih haw tawh thu a sawi a. Greater Aizawl Water Supply Scheme Phase-III a Vaivakawn Zohnuaia buaina pawh chinfel a nih tawh thu a sawi a. Laipuitlang atanga Aizawl hmar lama tui semna tur pawh hawn tawh niin, zan lama hna thawh thin a nih thu a sawi a. An hmachhawp – Tlawng weir Vertical Extension, Dedicated online payment app leh Smart metering te pawh bawhzui mek a nih thu a sawi a ni.

Tui Leak Report-na App Hmang Tha Zualte Chawimawina hun hi PHE Department-a E-in-C Er. Zodinthari chuan kaihruaiin Tui Leak Report-na App chu September ni 5, 2024-a tlangzarh a nih atanga tun thlengin report 350 a luh tawh thu leh thla tina report 23 lut ang a nih thu a sawi a. Cheng vbc. 770 hmanna tur Tan Lui Project atan Forest Clearance an hmuh tawh thu a sawi bawk a. He hunah hian Tui Leak Report-na App hmang tha zual mi pathum te hnenah chawimawina hlan niin vawi 40 report tu PB Lalkrosmawia, Tanhril chuan Rs. 10,000/- a dawng a, vawi 12 report tu F Lalhmangaiha,Chanmari in Rs. 7000/- leh vawi 9 report tu RK Nithanga, Chanmari in Rs. 5000/- an dawng a ni.

He hunah hian Aizawl WATSAN Circle-a SE, Er. Lalrinzuala Ralte chuan report pein Tui Leak report hi Fur aiin Thal-ah an dawng tlem zawk tih a sawi a, Aizawl North Division atangin report an dawng hnem zawk thu leh Aizawl North-II Sub-Division atanga an dawn hnem ber laiin Aizawl South-I Sub-Division atangin an dawng tlem ber tih a sawi a. Report luh tam ber thla, September 2024-ah Report tum 63 zet lutin tum dangah vawi 30 aia tam report lut a awm lo thung a. December 2025-ah ni 4 thlengin report tum 4 a lut tawh bawk a ni.