Hari Mandir humhalh zui dilna an sut leh tih sawi

Chief Minister Lalduhoma chuan nimin khan a Pisa-ah Mizoram Gorkha Mandir Sanchalan Samiti, Bazar Branch te kawmin Canteen kual a awm Hari Mandir chungchang a sawipui.

He inkawmna ah hian Mizoram Gorkha Mandir Sanchalan Samiti, Bazar Branch hruaitute chuan Prime Minister hnena lehkha an lo thehluh tawh, Hari Mandir humhalh zui tura an dilna chu Mizo-ram hmasawnna an ngaihpawimawh vanga an sut thu Chief Minister hi an hriattir a. Prime Minister hnena an lehkhathawn copy pawh Chief Minister hi an hlan nghal a. Hetihlai hian he Hari Mandir hi Aizawl khawpui lailia Veng 11 te lawina a nih avang leh Hari Mandira an bungraw thiang-hlimte dah zuina tur an mamawh avangin an inkhawm zui zelna tur hmun sawrkarin ngaihtuahsak se an duh thu an thlen nghal a ni.

Chief Minister hian Mizoram Gorkha Mandir Sanchalan Samiti hruaitute chungah hian lawmthu sawiin, Assam Rifles ram chhuahsan enkawl zuina chu Advisory Commmittee kuta awm a nih avangin Hari Mandir sawnna tur chu ngaih-tuahho a tul tur thu a lo hrilh a. “A sawn theihna tur hmunhma remchang te pawh dap tlang ila, a tul angin kan sawiho zel dawn nia,” tiin a chah nghal bawk a ni.

Tarlan tawh angin Assam Rifles ram Advisory Committee chuan NGO Coordination Committee te chu Hari Mandir chungchangah Samiti hotute titipui turin an ngen tawh a, an report pawh Advisory Committee hnuhnung berah khan an pe tawh a. An inkawmna kal zelah Samiti hruaitute hian Chief Minister hi an hmu a, Chief Minister hi Commissioner & Secretary to CM Vanlaldina Fanai chuan a tawiawm a ni.