SHP te Outsourcing Mizoram tana hlawk turah ngai

Power & Electricity Department changtu Minister F. Rodingliana chuan Mizoram-a Small Hydel Project te Outsourcing chu Mizoram tan a hlawk hle turah an ngai tih a sawi.

ZPM party in nimin-a Chhung Inkhawm an neih ah P&E Minister F. Rodingliana chuan Mizoram-ah Hydel Project 23 siam a nih tawh thu leh chung zinga 11 chu chhan hrang hrang avangin hluihlawn a ni tawh tih sawiin, Project 7 chu Outsource tura Tender a ni tih a sawi a. Heng zinga Project 3 te phei chu kum rei tak ‘run’ lohin a lo awm tawh niin a sawi bawk. P&E Minister chuan kan Project tha tak tak, Khawiva (1.05MW), Teirei (3MW), Kau-Tlangbung (3MW) leh Kawlbem (4MW) te erawh Department-in a la enkawl zui dawn tih sawiin, “Tuna SHP kan outsource tur hi Department chuan Mizoram tan hlawk hle turah kan ngai a. Lo outsource lo ta ila tun dinhmun anga kan enkawl hi chuan a hma anga hluihlawn leh vek mai a hlauhawm a ni,” a ti.

Tunlai hian Small Hydel Project Outsource chungchangah data dik tawk lo hmanga mipui hruaikawi thei tura thuchhuah, mi pakhat RTI zawhna behchhana siam nia hriat a awm thu pawh P&E Minister chuan sawiin, “Serlui B SHP hian kum 10 chhunga a Unit tharchhuah zawng zawng eng zat nge tih leh, tun dinhmuna kan leina rate-a chhutin pawisa engzat nge a tharchhuah tawh tih a ni a. Kum 10 chhunga a tharchhuah zawng zawng kha Rs. 5.83 an puntir ta ringawt niin a hriat a, a senso chipchiar ziak lang si lovin thuchhuah an rawn siam ve tawp niin a lang,” a ti a. “Serlui B Project hi NABARD loan hmanga siam a ni a, tunah hian a loan rulhna te nen a vaiin vbc. 245 chuang hman a ni a. Hei bakah hian a enkawlna senso zawng zawng chu Vawiin thlengin vbc. 318 chuang lai a ni a. Sawrkarin Unit 1 siam chhuak tura a senso zawng zawng chu Rs. 8.37 lai a ni. Tuna kan leina rate 5.83 nena Sawrkar hloh chhutin a inthlauhna hi Unit khat zelah Rs. 2.54 zel a hloh zawk a. Tun dinhmunah Serlui B enkawl tur hian EE atanga PE thleng mi 84 awmin kum 2023-24 chhung ringawt khan hlawh atan cheng nuai 326.37 lai sen niin O&M-ah sum engemaw zat sen a la ni bawk,” a ti.

Tlawva Hydel Project chungchang pawh P&E Minister chuan sawiin, “A Project Cost ringawt pawh cheng vbc. 85 niin, loan hi vbc. tam tak rulh tur a la awm a. Tun dinhmunah Sawrkarin Unit 1 zel siamchhuahna atana a hman chu Rs. 236.01/- a ni. Tlawva hi kum 3 chhung hian darkar 700 kan ‘run’ thei mang lova. A khawl chhiat bakah tui awm that loh vang a ni. Hetiang chung hian nuai tam tak sengin thawktu mi 40 lai rawih reng a ngaih tho avangin a senso hi a hautak em em reng a ni,” tiin Serlui A chu Brig. T. Sailova’n bul a lo tan tawh a nih avangin kum 30 chuang lo ‘run’ tawh lo mah se outsource tur zingah telin, “Hei hi kan ‘run’ theih chuan kan hruaitu hmasate chawimawina ni turah kan ngai,” a ti bawk.