‘Govt. Mizo High School Thul 2025’ hawnna neih a ni

Zirlaite kutchhuak thil chi hrang hrang phochhuahna, ‘Govt. Mizo High School Thul 2025’ chu nimin khan School Education Director Angela Zothanpuii chuan a hawng.

    Nimin atanga neih tan ‘Govt Mizo High School Thul 2025’-ah hian zirlaiten an thiamthil leh kutchhuak chi hrang hrang an entir a, Adventure-Zip Lining, Food Stall, Indegenious Entertainment, Arts & Craft, Beauty & Wellness, House of Horror leh Career Guidance neih a ni a. He Exhibition hawnna ah hian School Education Director Angela Zothanpuii chuan Govt. Mizo High School chu Government School zinga chhuanawm ber pawl a nih thu te, Zirtirtu pawh chhuanawm tak tak an nih thu a sawi a. Tunhnaiah Room chhung boruaka thil nawi zirchiang thei Hospisafe ZMC&H-a pek tur an siamchhuak thei chu chhuanawm a tih thu leh zirtirtu ten hetiang ti thei tura zirlaite an kaihruai thei chu lawmawm a tih thu a sawi a, hetiang Zirtirtu tha an awm hi zirlaite tan pawh lawmna tur a ni, a ti a. “Hriatna leh thiamna kan neih te hi mite hmuhah a eng tur a ni,” tiin chutiang tih theihna Thul 2025 a awm chu lawmawm a tih thu a sawi a. Literature Club in zirlaite thu leh hla ziahna ‘Thulkhung’ tih lehkhabu an buatsaih chu a tlangzarh bawk.