Laltlanzaova hnenah Huaisen chawimawina hlan

India rama Civil mi huaisen chawimawina ‘Jeeven Raksha Padak Award 2025’ chu nimin khan Champhai District chhung Tlangsam-a cheng Laltlanzova hnena hlanna leh chawimawina hun Home Minister K. Sapdanga hovin a Pisa-ah neih a ni.

Jeeven Raksha Padak Award hi chhiatna leh chetsualna kara huaisen taka mi nunna chhanchhuaktute hnena hlan thin niin he chawimawina hi mi huaisen bikte dawn thin a ni a; tun tuma chawi-mawina an hlan Laltlanzova hian September ni 7, 2024 (Inrinni) khan Khawzawl District, Dulte khawdai, Dilmawi-ah tui tla an awm tih a hriat veleh tui tla chhan nan tuiah a zuang lut ve nghal a; Dilmawi hi feet 50 zet a thuk niin theihtawpa a beih hnuah tuitla hi la chhuakin, a nunna a chhanhim a. He a thiltih ropui tak avang leh mi nunna hlu tak a chhanchhuah avang hian Jeevan Raksha Padak Award 2025 dawng tura thlanchhuah niin he chawimawina in a kentel Tangkapui, Citation leh pawisafai 1,00,000/- chu Home Minister K. Sapdanga chuan a hlan a ni.

Nimin-a hemi puala hun hman ah hian Home Minister K. Sapdanga chuan, “Mizote' n kan ngaihhlut em em chu mi huaisente an ni,” tiin pi leh pute hunlai atang tawha kan thupui ber pakhat pawh 'Thian chhan thih ngam' tih a nih thin thu a sawi a, tunlai khawvelah hetianga mi dangte nunna chhan nana mahni nunna thap ngam, mi huaisen kan nei leh, India rampum huap chawimawina dawng thei kan nei chu a lawmawmin a ropui takzet tih a sawi a, thangthar lo awm lehzel turte tan pawh entawntlak tak a nih thu sawiin, thalaite pawhin entawna, thian chhan thih ngam rilru chawinung thar leh theuh turin a sawm bawk a ni.

He hunah hian Champhai Deputy Commissioner Mohammad Aaquib pawhin Laltlanzova thiltih chu faktlak leh chawimawi phu a nihzia leh Mizote huaisenna chu fakawm a tih thu a sawi a; Home Department-a Joint Secretary (NP) V. Lalduhzuala hnen atangin Award dawn a nih theih nana kalphung awmte ngaihthlak niin Lalnunmawia Chhangte, Under Secretary, Home Department hnen atangin Jeevan Raksha Padak Award chungchang ngaithlak a ni bawk.

Jeevan Raksha Padak Award hi India rama Civil mite hnena lawmman pek thin, midangte nunna chhanhim nana thiltih chawimawi phu, mahni inphat chunga huaisenna lantirtute hnena hlan thin niin September ni 30, 1961 atanga tun thlengin kalpui a ni a. Tuitla leh kangmei laka chhanchhuah ngai te, Electric Current man te, khuarel chhiatna hrang hrang a lo thlena chhanchhuahna kawnga tha thawh, lainatna leh ngilneihna lantir chunga mi nunna chhanhima, huaisen taka beitute hnenah he chawimawina hi hlan thin niin chawimawina hi chi thum-ah siam a ni a, chawimawina dawng tur hi India Presdient-in a pawmpui hnuah chauh puanchhuah thin a ni.