CIJW Vairengte-a Commandent in Kolasib DC a kawm

Counter Insurgency and Jungle Warfare (CIJW), Vairengte-a Commandent thar Major General Kulvir Singh chuan nimin khan Kolasib District Bawrhsap Pisa tlawhin District Bawrhsap Robert C. Lalhmangaiha leh sawrkar mi pawimawh te nen DC Office Conference Hall-ah thutkhawm an nei nghal bawk.

He thutkhawm District Bawrhsap kaihhruai a neih ah hian Bawrhsap Robert C. Lalhmangaia chuan CIJW Commandant thar Kulvir Singh-a’n Kolasib Deputy Commissioner Office a tlawh chu thinlung takin lawmawm a tih thu a sawi a. Kolasib District chhunga sawrkar lama hotute leh CIJW Vairengte nen thawhhona tha tak neih zel a pawimawh thu sawiin, sawrkar hmalakna kawng hrang hrangah thawhhona tha tak nei chhunzawm zel turin duhsakna a hlan nghal a ni.

He thutkhawmah hian Kulvir Singh chuan CIJW Vairengte chu sipai training-na hmunpui a nih avangin khawvel hmun hrang hrang atangin sipai training turin an rawn pan thin thu a sawi a. An hnathawhna ah mipuite tana tangkaina an nei ve thei anih chuan theihtawp a puih an inhuam thu a sawi a, District administration nen pawh thawhhona tha tak an neih zel chu pawimawh a tih thu a sawi bawk a. Heng bakah hian ESM Welfares chungchangte, Sainik Aramghar te leh ZSB Office chungchang te a tarlang bawk. He hunah hian Sawrkar lama District Officials te, CIJW hotute leh NHIDCL hotute telin thawhhona kawnga pawimawh hrang hrangte an sawiho bawk a ni.