Forest ram Hectare 11,768.8909 a zau Non-Forest Area-ah chantir (diverted) a ni tawh

Kum 1990 atanga kumin (2025) thlengin Mizoram-ah Forest ram Hectare 11,768.8909 a zau chu Non-Forest Area-ah chantir (diverted) a ni tawh.

Mizoram CAMPA Governing Body chu nimin khan an Chairman leh Chief Minister Lalduhoma hovin CM Conference Hall-ah an thukhawm a, he huna tarlan a nih danin kum 1990 atanga kumin (2025) thlengin Mizoram-ah Forest ram Hectare 11,768.8909-a zau chu Non-Forest Area-ah chantir (diverted) a ni tawh a, heng ramngaw an tihchhiat rulh lehna tur hian hmasawnna hnathawktu (User Agency) te chuan Dan-in a phut angin PARIVESH Portal kaltlangin National CAMPA-ah pawisa an chhunglut thin a ni. Ramngaw rulhna tur an chhunluh atanga zaa 90 chu National CAMPA hian hnathawhna State Compensatory Afforestation Fund (Public Account-ah a dahlut (tranfer) zel a. Tuna Mizoram State Compensatory Afforestation Fund, Component hrang hrang belhkhawm awm zat chu Rs. 2,12,15,38,556 a ni.

He thutkhawm kaihruaitu Chief Minister Lalduhoma chuan, ramngaw siam thar kawngah chak zawka hma kan lak a ngai tih sawiin, “Hnathawhna tur sum kan nei a ni. Kan ram a lo mawi deuh deuh theih nan kan State Tree, Herhse hi uar thei ila, ramngaw siam thei thlai, kuthnathawktute tana tangkai si, Rubber ang chite pawh uar ang u,” a ti a. Thenzawl chu Peace City atana Master Plan siam mek a nih thu pawh Chief Minister chuan sawiin, “Rel kawng kalna tur hi an rawn tichiang thuaiin a rinawm bawk a. Heng thilte hi tihfel a nih hma chu Thenzawl-ah hma lo lak rih loh ni se, tihchhiat leh mai tur hmalakna kan lo kalpui palh kha a hlauhawm a ni,” a ti.

Nimin-a Mizoram CAMPA Governing Body thutkhawm ah hian chak zawka Fund hmanchhuah dan tur an sawiho a, Annual Plan of Operations 2024-25 hnathawhte leh Annual Plan of Operation 2025-26 hnathawk mekte an en a, CAMPA Work endik hna 3rd party Monitoring and Evaluation, Save Environment Association of Mizoram (SENVA) te report an ngaithla bawk. SENVA hian CAMPA APO 2020-21 leh 2021- 22 hnathawh chu 'Very Good' Grade (7.5/10) a pe a ni. Hei bakah hian thutkhawm hmasaa an lo rel tawh CAMPA Fund viltu tur Finance Officer dah chu chak taka bawhzui mek a nih thu tarlan a ni a. Department dangte nena Project inthuah kalpui a nih loh nan CAMPA Project te chu Planning Department hriattir zel tur a ni a, Project lian leh pawimawh bik chu Governing Body Chairman hova en zel tur a ni.