January 2026-a Sawhthing sawngbawlna peihfel hman tum

Champhai District chhung Khuangleng-a Sawhthing sawngbawlna hmun (Ginger Processing Unit) bun tura hmalak mek chu nakum (2026) January thlaa peihfel hman tura hmalak tum a ni.

Khuangleng-a Sawhthing sawngbawlna hmun (Ginger Processing Unit) bun tura hmalakna kalpui dan thlir hian nimin khan Adviser to Chief Minister (Handholding) KC. Lalmalsawmzauva hovin Aizawl-a Planning & Programme Implementation Committee Room-ah thutkhawm neih a ni a, he hunah hian Sawrkar Flagship Scheme Bana Kaih Scheme hnuaia kuthnathawktute thlai thar zinga thlai thenkhat lei leh hralh hna chu sawt zawka kalpui a nih theih nan Khuangleng-ah Sawhthing sawngbawlna hmun peihfel thui a pawimawh thu tarlan a ni a. Kum 2026 February thla atangin Sawhthing lei chu kalpui leh hman tum a nih avangin Khuangleng-a Ginger Processing Plant chu January 2026 chhungin inbun fel hman tura ruahmanna siam a ni a. He hunah hian Khuangleng Sawhthing sawngbawlna bunna hmun panna kawng metre 270 bawr vela thui sial, zauh leh thawmthat hnate, tui litre nuai khat dahkhawlna siamte, khawl chi hrang hrang chawm zo tur Transformer dahte leh a hmunhma tha taka hung a nih theih nana hmachhawp la awmte en ho a ni a. Heng hmabak la awmte hi January 2026 ralhmaa peihfel hman beisei a nih thu tarlan a ni.

He thutkhawm ah hian kumin December 5 leh 6-a Mizoram Agricultural Marketing Board (MAMB), Mission Organic Mizoram (MOM) leh International Fund for Agricultural Development (IFAD) te tangkawpin Mizoram kuthnathawktute thlai thar phochhuahna leh sumdawnpui tur zawnna hun, Buyer- Seller Meet an buatsaih tur pawh sawiho a ni bawk.