ZPM leh MNF te a ral lo zawk nih inchuha hmanlel ah puh

Mizoram Pradesh Congress Committee (MPCC) President Lal Thanzara chuan ZPM leh MNF chu a ral lo zawk nih inchuhin an hmanhlel mai mai tawh niin a sawi.

Champhai South Block Congress Committee buatsaihin nimin khan Champhai Electric Veng-a Mamuana Memorial Hall-ah Special Block Conference neih a ni a, he hunah hian MPCC President Lal Thanzara chuan Congress party chu kum 139 leh ni 338 a ni tawh tih sawiin, “Hemi chhung hian India ram leh Mizoram-ah party tam tak an zuihral tawh. Chutiang hlau chuan tunah ZPM leh MNF in a ral lo zawk nih inchuhin an hmanhlel mai mai tawh. Congress erawh a tho leh thin a, Congress sawi neptu ten nasa takin min sawisel thin mahse, Vawiina mithar 135 lo lutte hian mipuiin Congress party sawrkar an nghahhlelh tawhzia a pholang a ni,” a ti a. “Mipuiin sawrkar turin min duh a, tang nasa turin min duh. Aizawl khawpuiah enchhin chaka tuihala ZPM Vote tuten an Vote lak kir leh duh khawpin enchhin sual an intihzia chu an thunawn a ni,” a ti bawk.

MPCC President Lal Thanzara chuan MNF leh ZPM chu BJP nena sam inphiarzawm an nih thu sawiin, “Mizoram tana dân Sakei an tih chu BJP tlawn lungawi nan an pawm (passed) pui a, MNF pawhin FCAA an do tak tak a nih chuan NDA atanga bang turin ka ngen a ni,” a ti a. NLUP changtlung zawk an kalpui dawn tih sawiin “NLUP changtlung zawk kalpui dan tur Road Map kan duang mek a, mirethei fairelbel thleng phak chanchin tha a ni dawn. NLUP sawiseltute hian miretheite hmangaihna leh duhsakna an neih loh vang a ni,” a ti bawk.