Akashvani Aizawl ah Visual Radio System bun tum

Akashvani Aizawl buatsaih ‘Rimawi Kutpui’ chu Aizawl Tuikhuahtlang-a Akashvani Conference Hall-ah nimin khan hman a ni a, he hun hmanpuitu Akashavani Aizawl Director leh Mizoram Cluster Head DR Lalropuia chuan Akashvani Aizawl-ah Visual Radio System bun thuai tum a nih thu a sawi.

Rimawi Kutpui - Winter Wonderland hi kumin Krismas lo thleng tur inpuah-chahna puala Akashvani Aizawl-a thawktute rimawi hmanga intihhlimna atana buatsaih a ni a, he hun hmanpuitu Akashvani Aizawl Director DR. Lalropuia chuan Akashvani Aizawl-a Visual Radio System bun turin kawng hrang hranga hmalak anih thu leh Studio ti changtlung zual tur leh Camera bakah khawl tam tak ken tel a neih dawn avangin tih changtlun ngai tam tak a awm tih sawiin, peih fel thuai tura hmalak mek a nih thu a sawi a ni. DR. Lalropuia chuan hla chu mihring rilru leh ngaihdan thlak theihna kawng pawi-mawh tak anih thu pawh sawiin, tunlai khawvela midang ngaihsakna a tlem tawhna ah hla chu midangte dinhmun hrethiamtu leh harsatna an tawh changa in awmtleina ber anih avangin Rimawi Kutpui chu a pawimawh thu a sawi a, mi tam zawkin rimawi an hlut lehzual theih nan Radio thawktute tan la turin a sawm a ni.

Nimin-a Rimawi Kutpui-ah hian zai leh lam bakah intihhlimna hrang hrang nen hun hman a ni a, Tun dinhmunah Akashvani Aizawl-ah hian thawktu mi 170 an awm mek a, a ngheta thawk mi 50 leh a nghetlo a thawk mi 120 an ni.