ZPM sawrkar pawikhawih siamthat leh an tum tih sawi

MNF President Zoramthanga chuan, “ZPM sawrkar pawi khawih zozaite hi MNF sawrkar leh hunah siamthat leh a ni anga, nuaibo vek a ni ang,” a ti.

Nimin-a Lungsen Chhim Veng YMA Hall-a Political Training leh mithar lawmluhna hun a hmanpuina ah MNF President Zoramthanga chuan Hnam thinlungpu thalaiten ZPM sawrkar chu an kham tawh nia sawiin, “Pathian in Zoram hi a hmangaih a, hun khirh tak karah pawh a hruaichhuak thin,” a ti a. “Pathian remruat vangin MNF kan tla a, ZPM an sawrkar a, enchhin sawrkar mai an ni. Saiip puan sina bultan chu Zu khapna dan ennawnna in a zui a. Contract hna inpeknaah nasa takin pawi an khawih a. Ram an hralh a, kan rohlu tihral an an tum zel bawk a. Kawngchhiat lutuk avangin hnamdangte phei chuan lirthei chunga chuang chung pawhin kawng an hmu theilo hial a ni. Dawt an sawi zozaite hi sawisen a nilo a, ‘dawt sawiah pawh hian a chintawk a awm asin mawle,’ tih hial tur an ni,” a ti.

MNF President chuan ZPM sawrkar pawikhawih zozaite chu MNF sawrkar leh hunah siamthat leh a ni anga, nuaibo vek a ni ang tih sawiin, “Opposition party atangin ruling party ah mi an lut thin a ni a. Tunah erawh chuan, ruling atangin opposition MNF-ah hmun hrang hrang atangin an rawn lut zel a. MNF in thuneihna a neih leh thuai dawn vang a ni a. Pathian in tum neiin MNF a hruai thin a, kawng laklawhah min tawpsan lovang,” a ti bawk. MNF thuchhuah tarlan danin he hunah hian ZPM party atangin Voters 121, Congress party atangin Voters 75, BJP atangin Voters 28 leh Neutral 16 te chu MNF-ah lawmluh an ni.