Nov. 15 atangin Mizo Territorial Army (MTA) la dawn

Tun thla ni 15 atang khian Mizo Territorial Army (MTA) lak runpui chu Aizawl Mualpuia-a Rajiv Gandhi Stadium-ah neih a ni dawn a, hemi atana inbuatsaihna hrang hrangte chu nimin khan thlirho a ni.

Rajiv Gandhi Stadium VIP’s Lounge-a inbuatsaihna thlirhona hun hi State Level Committee on Territorial Army Coordination and Establishment Chairman Lt. Col. (Retd) Clement Lalhmingthanga MLA chuan kaihruaiin MTA Recruitment Rally hi Mizoram sawrkar leh 166 INF BN (TA) ( H&H), Assam te tangkawpa buatsaih tur a ni a, tha tak leh tluang taka neih a nih theih nan Mizoram Sawrkar hnuaia Department hrang hrangte bakah NGO leh Local Council thenkhat te hnenah mawhphurhna chanvo hrang hrang pek an ni a. Chung an mawhphurhna hlenchhuak tura an hmalak tawh chin leh an hmachhawp te chu nimin-a thutkhawm ah hian thlirho a nih bakah Inter-Department Coordination tha pawimawh zia te sawiho a ni bawk.

He thutkhawm ah hian Lt. Col. (Retd) Clement Lalhmingthanga chuan kan ram leh kan thalai te tana MTA Recruitment Rally hlutzia hriaa an awmna khua leh Veng a thalai te hnenah Recruitment Rally a tel tura fuih turin he huna tel te chu a chah a, “General Duty personnel-ah 144 lai lak a ni dawn bakah hmeichhe tan seat 9 reserved sak a ni bawk dawn a. A dil thei chin pawh kum 18-42 inkar lai a nih avangin a huam zau hle a ni. An hlawh te a that em em mai bakah mahni State-a awm reng siin, Hard Posting ( hardship) Allowance Rs. 9000 vel lai an la dawng bawk dawn a, 8th pay te an hman hunah phei chuan hlawh sang tak an la dawn. Hetianga Mizoram leh kan thalai te tan malsawmna kawng inhawng tur, Recruitment Rally-a mawhphurhna chanvo kan neih te hi ngai pawimawh ila, a tha thei ang berin hlenchhuah I tum theuh ang u,” tiin he thutkhawm a tel te chu a chah bawk a ni.

Mizoram-a a hmasa ber atan Territorial Army (Home & Hearth)-a tang turte lakna hi ruahman lawk ang chuan November ni 15, 2025 leh November ni 25, 2025 inkar chhung khian Aizawl Mualpui-a Rajiv Gandhi Stadium-ah neih a ni dawn a, tun tumah hian a vawikhatna leh a hmasa ber atan Mizo nula te Territorial Army-a an luh theihna tur kawng hawn a ni a, India Sawrkar chuan hmechhiate Armed Forces-a luhna tura hmalakna kalzelah tun tuma Territorial Army lak turah pawh hian General Duty-a post 144 lak turah Post 9 chu hmechhiate tana hauh sak a. Territorial Army atana lakte chuan Indian Army uniform nen chhuanawm taka ram tana hnathawkin, India Army te angin hlawh leh hamthatna bakah damdawi-a inenkawlna te an dawng dawn tih Lt. Col. (Retd) Clement Lalhmingthanga chuan a lo sawi tawh bawk a ni.