Tukin dar 8:00 atangin Dampa Bial-a Vote tla chhiar dawn

Dampa Assembly Bial by-election a Vote tla te chu tukin dar 8:00 atang hian chhiar tan a ni dawn ta a, hemi atan hian ruahmanna engkim peihfel a ni tawh.

Tun thla November ni 11-a Dampa Bial Assembly by-election a Vote thlak tluang taka neih a nih hnuah he inthlanna a Vote tla te hi tukin dar 8:00 atang hian Mamit DC Conference Hall-a Counting Hall-ah chhiar tan a ni dawn a, Vote tla te chhiarna tur atan hian Dawhkan 9 ruahman niin he inthlanna a Polling Station hrang hrang 41-a Vote thlakna khawl, EVM-a Vote tla te hi a indawt in chhiar a ni dawn a, Round 5-ah Vote chhiar hi zawhfel hman tura ruahman niin chawhma lamah result kimchang pawh hriat hman tura beisei a ni bawk.

He inthlanna a Vote tla chhiar tura ruat, Counting Officials te tan nimin khan Mamit DC Conference Hall-ah Training neih niin he hun hi he inthlanna a Returning Officer Malsawmzuala chuan a hmanpui a, Vote chhiar tura ruat te chu an mawhphurhna tha taka hlen turin a chah a. He hunah hian Master Trainer Mary L. Rodinpuii chuan Counting Officials te hriattur pawimawh hrilhin Mock Counting neih a ni bawk.

Tarlan tawh thin angin Dampa Bial-ah hian Vote nei mi 20,888 awmin by-election neih zawh takah mipa vote 8921 leh Hmeichhia vote 8430; an vaiin mi 17,351 ten Vote an thlak a, Vote nei zinga za zela 83.07 ten Vote thlakin hetah hian Postal Ballot a tel lo thung a. He inthlanna ah hian Candidate mi panga awmin rorellai ZPM leh MNF Party te chu inbei ber a ngaih an ni.