Kum 2026 Fur ruahtui tlak hmain kawng siam tum

PWD Minister Vanlalhlana chuan Mizoram kawngpui pawimawh chin chu kum 2026 Fur ruahtui tlak hma ngeiin thawh vek tum a nih thu a sawi.

Aizawl khawpui kawng siamthat hna (resurfacing) thawh chhoh mek chu nizan hmasa khan PWD Minister Vanlalhlana hian tlawhin an hnathawh te a enfiah a, hna thawktu Nidhi Creative Infrastructure Pvt. Ltd. (NCIPL) Silchar, Assam ten he hna an kalpui mek chu MPWD-te chuan endik zelin, hna kalpui dan chu lungawithlak rih hle ah an ngai tih an sawi.

KM 84-a thui Aizawl khawpui chhung kawngpui siamthat hna bultanna tur hi kumin April 15 khan PWD Minister Vanlalhlana hian Aizawl Ramhlun North-ah a lo hawng tawh a, Fur ruahtui tlak avanga chhunzawm theih a nih loh hnuah kumin October 30, 2025 khan chhunzawm leh a ni a. PWD Minister Vanlalhlana chuan Krismas hmain Aizawl khawpui kawng a tam thei ang ber zawhfel tum a nih thu sawiin, “A bak Mizoram kawngpui pawimawh chin pawh kum 2026 Fur ruahtui tlak hma ngeiin thawh vek tum a ni. Mizoram in ruahtui kan dawng tha a, hna thawh hun a tlem avangin Thal hun chhungin a tam thei ang ber kawngpui kan siam tha dawn,” a ti a ni.

PWD Minister chuan Aizawl khawpui kawng siamthat hna thawh mek chu an vei tlang tih pawh sawiin, “Tuna kawng mam tha viaua lang pawh hi Fur khat daih tur a awm mang lo mai thei. Chuvangin, a chhiat hmain kan phah chhuak leh vek dawn. Kawngpui lûn zual lai hmalakna hmasa ah kan hmang phawt dawn a, veng kar kawng te kan chhunzawm zel ang a, mipuite lo dawh hram hram turin kan inngen,” a ti a. Tuna hna thawk mektu Nidhi Creative Infrastructure Pvt. Ltd. te cghuan motor tlan tlem hun, zan dar 10:00 atanga a tuk zing thleng hna an thawk thin tih apwh sawiin, “MPWD ten uluk takin an vil reng a ni. Kawng chhuat chhah zawng leh quality-te uluk taka enfiah reng a ni a, kan enfiah chinah a chhah zawng 30mm tura ruahmanah 43mm te ni hlawmin, a lungawi thlak rih hle a ni,” a ti bawk.