Serchhip-a Skill Training kalpuina turin Model Centre hawnna neih a ni

Serchhip-a Skill Training kalpuina turin ‘Model Centre’ chu School Education Department-a Deputy Director (AE) R. Laltanpuii chuan nimin khan Sub-Hqrs. YMA Hall, Serchhip-ah a hawng a, he ‘Model Centre’ hnuaiah hian Job Role panga (5) hnuaiah Skill Training kalpui tur a ni ang.
School Education Department-a Adult Education Wing-in ‘Critical Life Skills and Occupational Skill Development Programme’ an kalpui hnuaia Skill Training neih tur hawngtu School Education Department-a Deputy Director (AE) R. Laltanpuii chuan zirna In hrang hrangah Vocational Training an lo kalpui tawh thu sawiin, tun tumah erawh chuan In lama mitin ten kan mamawh leh a lo-a kan awm theih loh, eizawnna atana hman nghal theih zirna atan he Training hi buatsaih a nih dawn thu a sawi a. Mizoram chu ziak leh chhiar thiam tamna, mihring za zela 98.2 in ziak leh chhiar an thiamna a nih thu sawiin, MA leh BA degree te nei mah ila sum lakluhna kan neih loh chuan harsatna a awm thu leh sawrkar hna in min daih vek dawn bawk si loh avangin kan thiamna te tipunga sum lakluhna leh eizawnna kan dap thiam a pawimawh thu a sawi a. He Training-a tel tur Trainees te chu an thil zir te uluk tak leh rinawm taka zira eizawnna tlak thiamna neih tum turin a chah a. Trainers te pawh an rilru zawng zawng nen theihtawp chhuaha zirtirna pe turin a chah bawk.

Critical Life Skills and Occupational Skill Development Programme hnuaia Skill Training kalpuina tura Serchhip Model Centre hawnna hun hi Serchhip District Education Officer (DEO) JR. Lalhruaitluanga chuan kaihruaiin Sub-Hqrs. YMA Serchhip-a Secretary Zonunsanga Kawlni chuan report a pe a. Tun tumah hian Tailoring, Beauty Culture, Baking Teachnology, Plumbing leh Electric/House Wiring-ah Training kalpui a nih dawn thu sawiin, heng Trade hrang hrangah hian Training turin mi 42 an inziaklut tih a sawi a. Training hi thla hnih (2) chhunga zawhfel hman tura ruahman niin Training chhuak te hnenah hian School Education Department chuan Certificate an pe dawn a ni.

Nimin-a he Training hawnna hunah hian Sub-Hqrs. YMA Serchhip-a Asst. Secretary Dr. Laldinpuia chuan Hunsrh hmangin Sub-Hqrs. YMA Serchhip President Kawlthuama, MHIP Sub-Hqrs. Serchhip-a President Lianthangi, MUP District Hqrs. Serchhip-a President T. Lalrawngbawla leh Sub-Hqrs. YMA Serchhip-a Training & Youth Affairs Committee Chairman C. Lalhminghlua te pawhin thu an sawi a. Chawhnu lamah T.C. Lalremsiama, Asst. Director (Adult Education) Directorate of School Education, Aizawl kaihhruaina in 'Sensitization & Discussion' neih zui niin C. Lalnunmawii, CAEO, District Adult Education Officer, Aizawl East chuan lawmthu sawiin hun a khar a ni.