Serchhip-ah Clinical Establishment Act sawihona nei
Clinical Establishment Act chungchang sawihoa thutkhawm hmasa ber Serchhip DC Meeting Hall-a neih hi Bawrhsap Paul L. Khuma chuan kaihruaiin Clinical Establishment Act chu mi nawlpui tan thil thar, kan la hmelhriat loh a nihna a awm tih sawiin, mipui ten chiang taka an hriatfiah theih nan hmalak a pawimawh thu a sawi a. Thiamna nei lova damdawi inchawhin a nghawng pawi theihzia hria a, nunna hlu tak chan theihna pumpelhna turin theihtawp chhuah a tul thu Bawrhsap chuan a sawi bawk.
He thutkhawm ah hian Clinical Establishment Act-a Serchhip District Level Coordinator, Dr. Albert Ngurnuntluanga chuan Doctor anga inchhalte leh thiamna nei si lova damdawi sang tak tak lo chawh ve thinte laka mipui an him theih nan leh ven nan District Registering Authority chuan hma an lak dawn thu leh an vilzui zel tur thu a sawi a. Mipuite pawhin fimkhur nachang an hriat a tul thu sawiin, Dan lo anga damdawi leh a kaihnawiha ti thinte lakah hremna pek theih a nih dante a sawifiah bawk a ni.
Clinical Establishment Act hnuaia in register theih dante leh dan lova hmalate hremna dan awmte he hunah hian sawi a ni bawk a. Tun dinhmunah Serchhip District-ah Clinic Register 28 awmin, Register loh Clinic pakhat leh Laboratory pakhat a awm mek thu sawi a ni a. District Registering Authority in Permanent Registration pek theih dan leh a dil thei chinte sawi niin mithiamin an endik hnuah Registration pek tlak nia a hriatte pek thin an ni tih tarlan a ni bawk. He thutkhawm ah hian Sr. CMO Dr. LP. Malsawma, District Medical Superintendent Dr. ZD Lalmuanawma, Addl SP H. Lalduata leh Join VC Chairman R. Sanghmingthanga te an tel bawk a ni.