Sub-Hqrs. YMA Khawhar Zai Intihsiak neih tan a ni

Sub-Hqrs. YMA Serchhip hnuaia YMA Branch hrang hrangte tana Khawhar Zai intihsiakna chu nizan khan Serchhip-a Sub-Hqrs. YMA Hall-ah neih tan a ni a, zanin hian zawhfel tura ruahman a ni.
Serchhip AOC Veng-a cheng thin ZD. Sanglura leh Saimawii Sailo te hriatrenga atana buatsaih ‘Sub-Hqrs. YMA Khawhar Zai Intihsiak’ hi Sub-Hqrs. YMA Serchhip-a President Kawlthuama chuan hawngin YMA hruaiktu hlun boralta hriat-rengna atana hetiang hun buatsaih a nih chu hlu a tih thu a sawi a. Mizo ten Khawhar zai hlu tak kan neih chu kan humhalh a pawimawh thu sawiin, kan uar deuh deuh pawh a tul thu a sawi a. Intihsiakna a tel Branch hrang hrangte chungah lawmthu a sawi bawk a ni.

‘Sub-Hqrs. YMA Khawhar Zai Intihsiak’ hawnna hun hi Sub-Hqrs. YMA Serchhip Vice President PC. Vanlalluna chuan kaihruaiin Zaipawl Committee Secretary C. Lalneihkima chuan report a pe a, a hawnna neih a nih hnu hian intihsiakna neih chhunzawm nghal a ni.

Sub-Hqrs. YMA Serchhip buatsaiha he intihsiakna ah hian Branch 15 telin Hla pathum thlan atanga Hla pahnih hmangin intihsiakna neih a ni anga, nizan khan Branch 5 ten intihsiakna neiin Vawiin chawhma lamah Branch 5 ten intihsiakna nei lehin chawhnu lamah Branch 6 ten intihsiakna an nei dawn a. Heng atang hian a titha zual Branch pathum thlangin zanin hian intihsiakna neih leh a ni anga, zanin hian result puangin intihsiakna hi zawhfel tur a ni ang.