Sazu puang a ziaawm, Sazu tihchhiat zat chhut mek

Mizoram District hrang hranga Rawthing tam avanga Sazu puang chu ziaawm deuhin Buhpui a bei tam lo nia sawi a ni a, Agriculture Department chuan Sazu puangin thil a tihchhiat zat an chhut mek.

Zalen-in Agriculture Department-a thawktute hnen atanga thu a dawn danin Sazu puang hian Buh thar hmasa Tai Buh kha an bei deuh a, chutih laiin Buhpui erawh an bei nasa lo niin an sawi a. Hetia Sazu puang a ziaawm chhan hi Tur hmanga nasa taka beihpui an thlak vang nia an hriat thu sawiin, Sazu hi Lo pakhatah 80 dawnte hrai hlum an awm niin an sawi bawk. Sazu hian Tlangram Lo an bei nasa zual a, hetihlai hian Leilet lam erawh an bei lem lo nia thudawn a ni.

Sazu in Buh leh thlai a tihchhiatte chu State Disaster-a puang turin an ngen tih Agriculture Department thawktute chuan an sawi bawk a. Disaster-a puang tura ngenna hi October thla khan sawrkarah an thehlut tawh tih sawiin, Committee an la thut loh avangin Disaster a puan anih dawn leh dawn loh a la hriat loh tih an sawi bawk.

Agriculture Department thawktute chuan Sazu puangin a tihchhiat zat chu District hrang hrang atangin data lakkhawm mek a ni tih sawiin, a zat chiah a la hriat loh a, an chhut mek tih an sawi bawk a. Chhinchhiahna hnuhnung berah chuan Rawthing tam vang hian Sazuin chhungkaw 5,622 te thlawhhma hectare 2,331.154-a zau a tihchhiatsak tawh a ni. 

Kum 2006-2008 chhunga Mizoram-a Mautam zirchiangtu, Australian Sazu lam zir mi, Kenneth Peter Ken Aplin chuan Sazu pate hian ei tur duhtawk an hmuh loh chuan an note ei an ching nia sawiin, Mautam leh Thingtam lai chuan mautak leh rawthing rah ei tur duhtawk an neih avangin Sazu hi an pung chak ta em em a. An intam chhuah ve leh thlawhhma ah ei tur zawngin an lut a, buh leh bal leh thlai an hmuh apiang an vaihma tawh mai thin niin a sawi a ni.

Mizoram hmun hrang hranga Sazu puang hi Tûr hmanga hrai an nih vangin leh heng Sazu thite hi Chakai ten an ei palh theih vangin Chakai ei a him lo thei tih Agriculture mi thiamte chuan an sawi a. Agriculture mi thiamte chuan Sazu atanga natna chi hrang hrang pumpelh a nih theih nan In leh a vel vawn fai, Inchhunga Sazu luh theihna tur kua leh awng tihphui, ei leh in ningnawi paihna felfai tak siam leh Sazu luh theih lohna tura siam te, Thang kamte a pawimawh niin an sawi a. Sazu nung lai man emaw, a thi khawih emaw dawn a nih pawhin kutlawng-a khawih loh a him ber tih an sawi bawk.

Mizoram hmun hrang hranga Sazu puang chuan natna hrang hrang an pu darh thei tih pawh sawiin, a bik takin Rannung Seh (Scrub Typhus) natna a pu darh nasa tih finfiah a nih thu an sawi bawk.