Janjatiya Gaurav Varsh -Tribal Pride Day hmang

Tribal Pasaltha te chawimawina ni 'Janjatiya Gaurav Varsh -Tribal Pride Day' chu Inrinni khan Aizawl-a Raj Bhavan tualzawl-ah a ni 2-na atan hman chhunzawm leh niin District dangah te pawh he ni hi hman a ni bawk.

Tribal Pasaltha te chawimawina ni kharna hun Raj Bhavan tual-a hman ah hian Planning & Programme Implementation Department Secretary Lalmalsawma Pachuau chuan Tribal Pride Day an hman chu Tribal nihna leh Mizo nihna miin a chhuan tharna hun a ni chho zel tih sawiin, mahni nihna chu ngaihhlut zel a pawimawh tih a sawi a. Tribal Day puala Mizo kutchhuak hrang hrang phochhuah te chuan Mizote themthiam zia leh thil ngaihtuah chhuah thiam zia te a lantir tih sawiin, Mizo hla leh lam an entir te pawhin Mizo khawtlang nunho dan te, nula leh tlangval hlim taka inkawm dan nuam tak te a entir tih a sawi a, Mizo taka khawsak chu chapopuia ngaihhlut tham a nih thu sawiin, hnamdangte pawhin hetiang khawtlang nun hi an awt hle tih a sawi a, thangthar te pawhin mahni hnam nunphung hrechianga an chhawmnun zel a pawimawh tih a sawi bawk.

He hunah hian Planning & Programme Implementation Department-a Project Assistant H. Lalhruaitluanga chuan India ramin zalenna a hmuh theih nana Tribal hruaitu thawh hlawk tak, Bhagwan Birsa Munda pianchamphaphak vawi 150-na pualin November ni 1 atanga November ni 15 thlengin ram puma British awpna lo sualtu, Tribal pasaltha te chawimawina hun 'Janjatiya Gaurav Varsh' hi hman a ni tih a sawi a, Mizoram-ah chuan ni 2 chhung hman a ni a, kumin hi a vawikhatna a nih thu a sawi bawk. Mizoram-a Tribal pasaltha te chawimawina hmun Raj Bhavan tualzawl-ah hian Pasaltha Khuangchera, Nikuala, Lianphunga, Lalnu Ropuiliani leh Zakapa te chanchin leh an lem te phochhuah a ni a, Mizote kutchhuak hrang hrang te leh ei leh in tur, puan leh thiamhnang hmanga thil siam chhuah hrang hrangte chu Stall 14-ah mipui lei theiha phochhuah a ni bawk.

Kolasib-ah pawh Bawrhsap Pisa tual- Janjatiya Gaurav Diwas kharna pualin hun hman a ni a, Bawrhsap Robert C. Lalhmangaiha chuan he hunah hian Mizoram pawhin zalenna sualtu huaisen Lalnu Ropuiliani leh mi ropui tak tak te an nei ve a ni tih hre reng turin kalkhawmte chu a chah a. British hunlaia Mizo lalte, a bikin Lalngura Sailo (Sentlang Lal), Liankunga Sailo (Mualvum Lal) leh Thanghulha Sailo te'n huaisen taka British sawrkar an dodal dante a sawi a ni.

Saitual-ah chuan District Bawrhsap Dr. Lalngura Tlau hovin Janjatiya Gaurav Diwas lawmna hun hman a ni a, khaw pathum , Tawizo, Sihfa, Lenchim khuaah te ‘Certificate & Aadhar free Camp’ neih a ni a, mipuite chu a thlawn vekin Certificate leh Aadhaar te siam sak an ni.