Raltlan te tanpuina tur ‘Humanitarian Hub Enablement’ tlangzarh

Mizo Zirlai Pawl (MZP), Humanitarian & Development Research Initiative (HADRI) leh Australia Chin Community Council (ACCC) tangkawpin Mizoram chhunga raltlante tanpuina tur ‘Humanitarian Hub Enablement’ an buatsaih chu nimin khan tlangzarh a ni.

‘Humanitarian Hub Enablement’ tlangzarhna hun hi The Precinct Fortitude Valley, Queensland, Australia-ah India Sana-a nimin zing khan neih niin MZP President, Dr. C. Lalremruata chuan online (zoom) hmangin Humanitarian hub thil tum leh Mizoram chhunga raltlante dinhmun tlangpui sawiin, Mizoram chhunga chengte chuan theihtawp chhuahin an lo kuangkuah tawh thu a sawi a. He hun hmanpuitu Rajya Sabha MP K. Vanlalvena chuan, Australia sawrkar (Federal Government) leh Australia chhunga Doners ho chu Humanitarian Hub kaltlang hian Mizoram chhunga kan unau rawn raltlante tanpuina pe turin a sawm bawk a ni.

He hunah hian Australia Chin Community Council-a General Secretary leh HADRI-a Managing Director Lawmthang chuan Mizoram mipuite'n Myanmar atanga raltlante tha taka an lo dawnsawnna leh enkawlna avangin lawmthu a sawi a, Australia sawrkar chu Mizoram chhunga raltlante tana che chhuak ve turin a sawm nghal a. Senator of Australia, Paul Scarr pawhin Australia sawrkar (Federal Government) hnenah Mizoram chhunga raltlante tan Humanitarian aid sanction turin sawrkar a nawr tur thu a sawi bawk. Nimin-a he hun hmanna ah hian MZP General Secretary C. Lalhmingsanga pawh a tel bawk a ni.