Chief Minister in CVSAH kum 27 tlin lawmna hmanpuiin Pesticide Residue Analysis Laboratory a hawng

College of Veterinary Sciences & Animal Husbandry, Central Agriculture University (Imphal), Selesih chuan nimin khan an kum 27 tlin lawmna hun buatsaihin Chief Minister Lalduhoma chuan he hun hi a hmanpui a ni.

CVSAH kum 27 tlin lawmna hun an College Auditorium-a neih ah hian Chief Minister chuan Selesih-a Vety College chu Mizoram mai ni lovin, India hmarchhak State dangte tana zirna In tangkai a nih thu sawiin, tluang taka kum 27 zet a kal ta chu lawmawm a tih thu a sawi a. “Kan hriat angin Mizoram mipui tam ber hi Agriculture kaihhnawiha eizawng kan ni a, ranvulh phei chu kan uar em em a. Ranvulh leh enkawl lama thiamna nei kan mamawhna a sang a, mipuite hnena zirtirna uar taka kalpui a ngai bawk a. Chung thil pahnih kan mamawh em em te min thawhsaktu tangkai tak chu he College hi a ni,” tiin “Mipuite eizawnna leh he College hi a inzawm tlat avangin mipuite pawhin he College leh Thenzawl Horticulture College hi kan ngaihven a ni,” a ti a. Zirtirtu leh thawktute inpekna fakin, zirlai naupangte pawh taima taka an zirlaite zir turin a fuih bawk.

Chief Minister chuan he College Campus chhunga sak, Thei leh thlai thianghlim dan endikna tur, Pesticide Residue Analysis Laboratory chu a hawng nghal bawk a, Pesticide Residue Analysis Laboratory chu All India Networks Project on Pesticide Residue hnathawh nan chauh ni lovin kan loneitute tan leh kan thlai lakluhte endikna atan a tangkai thei dawn tih a sawi a. “Vantlang hriselna tha tawk kan neih theihna atana hmanraw pawimawh a ni. Zirlai leh zirbingna neite tan a tangkai hle bawk ang. Mizoram tan hmasawnna chhinchhiahtlak a ni,” a ti bawk.

Sawrkar laipui chuan thlai hrisel leh thianghlim thar a tulzia hriain kum 1985 kha All India Network Project on Pesticide Residue a din a, anni hian rampumah Centre 19 an nei thin a. Kum 2010 khan hmarchhak Bial-a a awmchhun ni turin Selesih Vety College pawh hi Centre pakhatah a pawm a. Kum 2019 khan hmanraw changtlung leh Centre puitling tak a nih theih nan College hian Mizoram sawrkarah RKVY Scheme kaltlangin cheng nuai 1180 man project a thehlut a, sawrkar hian lo pawmsakin hmalak zui nghal a nih hnuah hawn a ni ta a ni.

Nimin-a College of Veterinary Sciences & Animal Husbandry, Central Agriculture University (Imphal), Selesih kum 27 tlin lawmna hunah hian College Dean Dr. Lalnuntluangi Hmar chuan inlawmna thu sawiin, khual zahawm Horticulture Minister C. Lalsawivunga leh Agriculture Minister PC. Vanlalruata te pawhin thu an sawi a, anni bakah hian Dr. Anupam Mishra, Vice Chancellor, Central Agriculture University, Imphal leh Dr. Vandana Tripathy, Network Coordination, All India Networks Project on Pesticide Residue te pawhin thu an sawi bawk a. He College-ah hian zirlai 440 an awm mek a, kum 1997-a bul an tan atanga chhiarin tun thlengin BVSc & AH Graduate 891, Post Graduate 378 leh Ph.D 15 an zirchhuak tawh a ni.