National Press Day 2025 pualin Mizoram-ah hun hman a ni

India rampuma Chanchinbumite Ni, National Press Day 2025 chu nimin khan hmun hrang hrangah hman niin Aizawl-ah pawh MJA Geneal Headquarters leh IPR, P&S Department-te huaihawtin he ni pual hian hun hman a ni.

Aizawl I&PR Auditorium-a National Press Day puala hun hman hi IPRP&S Department changtu Secretary Betsy Zothanpari chuan hmanpuiin Chanchinbu mite chu ram tana rawngbawltu pawimawh tak an ni tih a sawi a. Sawrkar tha tichak zel tur leh mipuite zirtir tura an dinhmun pawimawhzia chu hria a, thahnemngai taka an eizawnna kawngah chuan theihtawp chhuah zel turin a fuih a. Khawvel hmasawn zelah mi tam takin Chanchinbu chu hriatna hnar rintlak ber a an ngaih pakhat a nih angin, an thuthar lak khawm leh mipuite a an puanchhuah leh dan thu ah pawh fimkhur leh thuhnu dawn taka mipuite hnena puangchhuak thin turin Chanchinbumite chu a chah a. MJA memberte chu hriselna ngaipawimawh tura chahin, incheina leh news zawn kawngah pawh hmasawn zel a pawimawh thu leh MJA-in hma a sawn zel theih nan sawrkar pawhin theihtawp a chhuah thu sawiin, National Press Day chu hlim taka hmang theuh turin duhsakna a hlan nghal bawk a ni.

Nimin-a he hun hman hi I&PR Director K. Vanlalsangi chuan kaihruaiin MJA General Hqrs. President C. Lalrambuatsaiha chuan inlawmna thu a sawi a, Mizoram buai laia inremna atana thawhhlawk tak leh I&PR Diredtor hlui L.R. Sailo leh Mizo hmeichhia, MJA member zinga Mass Communication-a Doctoral Degree nei hmasa ber Dr. Lalnunkimi Colney-te hnenah chawimawina thilpek hlan niin anni pawh hian thu an sawi a. I&PR Deputy Director Pratap Chhetry chuan National Press Day 2025 thupui, ‘Digital Hun-a Print Media dinhmun’ (The role of print Media in the Digital Age) tih hmangin kalkhawmte zirhona neihpuiin, zawhna leh chhanna hun hman a ni a, MJA Vice Presicdent C. Lalhmachhuana chuan lawmthu sawiin hun hi a khar a ni.

National Press Day hi Lunglei Press Club-ah pawh MJA Lunglei District chuan hmangin Lunglei SP J. Lalmuankima MPS chuan khuallian niin a hmanpui a, he hun hi MJA Vice President Lianchama Chhangte chuan kaihruaiin Lunglei SP chuan Press mite chu sawrkar inrelbawlnaa hmun pawimawh luahtu; Fourth Pillar zing a mi an nih thu sawiin, “Press mi kan nih chhung chuan kan upa emaw, naupang emaw, tunlai thiamna Artificial Intelligence kan thiam a ngai,” tiin, hemi kawnga inzirna tur Lunglei Police-te’n an neih thu leh kumthar atangin MJA Lunglei member te chu an duh anih chuan an zirtir thei dawn tih a sawi a. Hei bakah hian New Criminal Law pawh Media-te’n hriat zau a tul avangin Police lam nena zirho dan pawh ruahman tum a nih thu a sawi bawk.

National Press Day hi November ni 16-ah hman thin a ni a, kumin hian Pathianni a nih avangin Mizoram-ah chuan nimin khan hman a ni.