Kum 2028-ah BJP thli a tleh tawh dawn niin sawi

BJP Mizoram President Dr. K. Beichhua chuan kum 2028-ah chuan Aizawl khawpui chhungah ngei pawh BJP thli a tleh tawh dawn niin a sawi.

BJP Mizoram chuan nimin khan Aizawl-a an Party Office-ah Karthar Inhlanna leh Political Session neiin he hunah hian an President Dr. K. Beichhua chuan Dampa Bial-ah BJP chuan Vote 1500 chuang an hmu ta tih sawiin, “Heng Vote-te hi a hmun nghak tur te an ni a, By-election ah nilo, 2028 General Election-ah Dampa mipuite'n an beisei ang an hmuh theih loh phei chuan Party pathum-a kan beiseite a thlawn tawh avangin he kum 3 chhung hi finna kailawn-ah an hmang ngeiin a rinawm,” tiin “Chuvangin Dampa Bial-ah mai nilo, Aizawl khawpui chhungah te ngei pawh BJP thli hi a tleh tawh dawn a ni,” a ti a. “Mipui kan fing tawh a, Politician-te'na kan thusawite Video clip en tur a awm zel thin a, an thutiam an tihhlawhtlin hleihtheih loh avangin, thutiama ding tlat thin Party awmchhun BJP lam an rawn hawi tawh ngei dawn a ni,” a ti.

BJP President chuan Dampa Bial By-Election neih zawh takah lawmthu sawina tur tam tak a neih thu sawiin, “Dampa Bial By-Election a kan hmalakna a hlawhtlinna kan nei tak loh ah hian tumah mawhpuh tur an awm lova, a mawhphurtu ber chu kei President hi ka ni,” tiin an Party tana thawktu hrang hrangte chungah lawmthu a sawi bawk.

He hunah hian Dampa Bial-a BJP Candidate Lalhmingthanga pawhin Dampa bial By-Election ah BJP-in an beisei Result an hmu lo tlang tih sawiin, “Hemi ah hian mawhpuh tur mimal ah an awm in ka hre lova, mi tin maiin kan theihtâwp kan chhuah vek a ni,” a ti a. “BJP ka chhuahsan leh mai ring mi tam tak an awm a, nimahsela BJP hi chhuahsan ka tum lo tih hi ka sawi duh a ni. Vawiin ah hian Dampa Bial-ah hian BJP Member tak tak te hi kan tlem hrih hle mai a, kan bul tanna a têt deuh bik êm avangin, hmalak a harsa bik êm êm a ni,” a ti bawk.