Serchhip-ah District Bawrhsap hovin Janjatiya Gaurav Diwas hman a ni

India rama Tribal te chawisanna ni, ‘Janjatiya Gaurav Diwas’ lawmna chu Inrinni khan hmun hrang hrangah neih niin Serchhip-ah pawh District Bawrhsap Paul L. Khuma hovin hman a ni a, he ni hi Munda hnam-a mi, zalenna sualtu Birsa Munda pian champhaphak denchena hman a ni.
Serchhip Bawrhsap Pisapui Hall-a Janjatiya Gaurav Diwas lawmna hi Serchhip Addl. DC Lalrinzuala chuan kaihruaiin Bawrhsap Paul L. Khuma chuan mi huaisen Birsa Munda chanchin atangin zir tur tam tak kan neih thu sawiin, lehkha zir ngaina mi a nihna te chu zirlai ten an entawn a tul thu leh nu leh pa te pawhin an fate fuih thar nan hmang se a duh thu a sawi a. Birsa Munda leh Tribal dangte beihna avangin ‘Chota Nagpur Tenancy Act 1908’ a lo chhuah thu pawh sawiin, Tribal mi te chenna ram chinah chuan Non-Tribal ten ram neitu nihna an nei thei lo a, hei hi keini Mizo te tan pawh malsawmna a ni, a ti. Hei bakah hian Bawrhsap chuan British sawrkar laka zalenna sualtu Mizo Lalnu Ropuiliani chanchin sawiin, mi huaisen, a vawn tawh lai leng chu thlah duh ngai lo mi, mi rilru nghet, mahni inrintawkna nei mi a nihna te tunlai thangthar ten entawn se a duh thu a sawi a. Mi huaisen kal hmasate hnung zuiin, keini pawhin kan ram tan, kan hnam tan, kan mawhphurhna te taima taka kan hlenchhuah a pawimawh thu a sawi a ni.

Janjatiya Gaurav Diwas hi kar hmasa khan chawlhkar tluan-a neih District Education Officer (DEO) Office hmalaknaa zirlaiten Mizo infiamna chi hrang hrangte an School-ah an entir a. High School chin chunglam tan Essay leh Poetry Writing Competition buatsaih niin Inrinni-a a kharna hunah hian Govt. Serchhip College-a Zirtirtute atangin K. Lalrinchhana leh Dr. Zarzosanga ten Mizo pasaltha te leh zalenna sualtute chanchin te, Literature hmanga sulhnu pawimawh tam tak min hnutchhiah atanga zirtur kan neih te lakhawmin he huna zirlaite leh Birsa Munda piancham puala Janjatiya Gaurav Diwas hmangtute an zirtir bawk a, Hnam lam leh zai te entir niin Bawrhsap Pisa-ah hian DIPRO buatsaihin Photo Exhibition buatsaih a nih bakah SHG ten an thilsiam te lei theih turin an phochhuak bawk a; Hmanlai-a Mizo puan hrang hrang leh hmanrua chi hrang hrang te pawh mipuite hmuh theih tura phochhuah a ni bawk.

Janjatiya Gaurav Diwas puala Essay inziahsiak ah hian mi 144 telin Lalhmangaihzuala, Class XII, GHSS chu pakhatna niin Zodinpuii, Class X, JM H/S leh Vanlalhruaikima Class IX, Goodwill English Academy chu pahnihna an ni a, Lalchungnunga, Class XII, GHSS chu pathumna a ni bawk. Poetry inziahsiak ah hian mi 140 telin Lalrosanga, Class XII, GHSS chu pakhatna niin Lalramhmangaihpuii, Class IX, JM H/S chu pahnihna leh Lalhlimpuii, Class XI, GHSS chu pathumna an ni a, heng lawmman te hi Serchhip SP Gavit Gogna chuan a hlan a ni.