MSU in Minister hnenah zirna kaihhnawih thil pawimawh hrang hrang an sawipui

Mizo Students' Union (MSU) General Headquarters hruaitute chuan nimin khan School Education Minister Dr. Vanlalthlana chu a Pisa-ah hmuin MSU General Conference neih zawh taka an thurel hrang hrangte an thlen.

MSU General Conference neih zawh takah khan Education Department kaihhnawih Agenda panga (5) rel niin heng te hi MSU hruaitute hian Minister hnenah hian an thlen a, Zirna In hrang hranga Casual Teacher (Middle School, High School, Higher Secondary School leh College) te dinhmun (Job Security) tha zawk pek an nih theihna tura Education Minister chu ngenin, Minister chuan Sawrkarin Zirtirtute an ngaih pawimawh thu sawiin, Casual Teacher te pawh MSU ngenna angin an dinhmun te chu an lo ennawn leh tur thu a sawi a. Hei bakah hian Higher Secondary School leh College Zirtirtu nghet (direct recruitment) a zing thei ang bera lak anih theih nan a hmalak sak tura ngen bawkin, kum 1997 hnu lamah kan ram-a zirna In sang Higher Secondary leh College-ah Zirtirtu nghet lak a nih tawh loh avangin zirna pawn a tuar nia an ngaih thu an sawi a, tunhnai ah ZPM hmalakna vangin College Zirtirtu ngheta lak tur Advertisement awm ta pawh lawmawm an tih thu te sawiin, chutih rualin Zirtirtu nghet lak (Direct Recruitment) mumal leh zing zawka la turin Minister hi an ngen a, Minister chuan Direct Recruitment-a lak anih theihna tur hian hma an lak tur thu leh Post ruak tam tak hnawhkhah dan turah DP&AR te nen inrawn chunga hma an lak tur thu a sawi a ni.

Hei bakah hian Mizoram Sawrkar hnuaia Registered School zawng zawng te Grade System siam tura MSU ten an ngenna chu tha a tih thu Minister chuan sawiin, NEP in a phut anga Grade System tha tak an neih chu tha a tih thu a sawi a ni. Tunah hian School Qualification Assessment and Accreditation Framework (SQAAF) chu a taka kalpui anih theih nan thawktu thenkhat te Training an neih mek thu sawiin, MSU te ngenna anga tihhlawhtlin thuai an tum tur thuin a lo chhang a. Sawrkar in Cess a lak atanga Education Sector in a chan tur chu a vaiin a ngai ang anga dahlet a, chu chu School Education Department leh Higher & Technical Education Department te chan inanga semrual nise an duh thu an thlen pawh Minister chuan hemi chungchang chu Cabinet-ah ngaihtuah that tura an dah thu a sawi a ni.

Mizoram Engineering College, Lunglei chu a nih dan tur ang taka a kal (Function) vat theih nan hmalak pui tura an ngenna pawh Minister chuan theihtawp an chhuah mek thu a sawi a. MSU duhdan anga kumthar 2026-2027 Academic Session tan ruala Civil Engineering leh Computer Science-ah Class tan an tum thu a sawi a. A thawktu tur chungchangah pawh a rang thei ang bera lak fel an tum thuin alo chhang a ni.