YMA CCC thutkhawm nei

YMA Rorelna sang ber dawttu, Central Coordination Committee (CCC) Meeting vawi 104-na chu nimin khan neih niin YMA Inkhawmpui Lian neih zawh taka an thurel hrang hrang bawhzui dan tur an ngaihtuah.

Nimin-a CCC Meeting hi Aizawl-a Central YMA Hall-ah neih niin Central YMA President R. Lalngheta chuan a kaihruai a, Sakawrdai khuaa YMA Inkhawmpui Lian vawi 75-na hman zawh tak thlirletna hun hmangin Sakawrdai khua ten mikhual an thlen danah palai ten lawmawm leh nuam an tih thu an sawi a, rorel inkhawm erawh tun aiin Palai ten ngaihpawimawh a ngaih thu leh inkhawmpui kal uar tura tan an lak a ngaih thu te an sawi a ni.

Nimin-a CCC Meetiang hian YMA In-khawmpui Lian neih zawh taka an thurel bawhzui dan tur ruahmanin, YMA inkaihhruaina leh nih-phung leh hruaitute mawhphurhna, rampumah inzirtirna neih ni rawh se tih te; Mizoram chhunga hnamdang sumdawng, phalna nei lo tam ta lutuk hi titlem turin YMA-in hma la rawh se tih te; Mizo hmeichhia ten hnamdang pasal neih zel loh nan Central YMA hian inzirtirna nasa zawkin kalpui rawh se tih te; Mizo infiamna te chawisan a nih theih nan Central YMA in hma la rawh se tih leh Zohnahthlak chi peng hrang hrang Mizoram a chengte zingah chi bil hmalakna a awm tawh loh nan Central YMA in hma la rawh se tih te chu CEC in ruahmanna lo siam se an ti.

Heng bakah hian YMA Khawih an rel, Inner Line Permit (ILP) hi tun aia khauh leh awmze nei zawka kalpui anih theih nan YMA in Sawrkar-ah thlen rawh se tih leh Mizoram chhunga inkal-pawhna kawngpui hrang hrang a chhiat avanga mipuiten harsatna kan tawk nasa lutuk thin hi a lo ziaawm theih nan Mizoram Sawrkarin tun aia chak zawkin hma la rawh se tih chu CEC in rua-hmanna lo siam se tiin Tui hnar humhalhna dan siam ni rawh se tih chu CEC bawhzui turin an ti a ni. He hunah hian Rorel palai 248 telin Sub-Hqrs. YMA Serchhip atangin hruaitute an kal a ni.