Dampa Bial Inthlanpui ah Vote za zela 83.07 a tla phak

Dampa Bial Assembly by-election a Vote tlak dan kimchang chu hriat theih a ni ta a, Vote nei zawng zawng atanga chhutin za zela 83.07 ten Vote an thlak a ni.

Niminpiah-a Dampa Bial-a Assembly by-election Vote thlak ah hian an Bial pumah Vote nei mipa 10,637 leh hmeichhia 10,231; an vaiin mi 20,888 an awm a, Mipa 8921 leh hmeichhia 8430,an vaiin mi 17351 ten Vote thlakin hei hi 83.07% a ni a. Hetah hian Postal Ballot hmanga vote tla chhiar tel a la ni lo thung a ni. He inthlanna ah hian Hruiduk Polling Station chu vote tlak thatna ber niin 93.09% a tla a, Zopui Polling Station chu a tlakchhiatna ber niin 75.86% a tla thung a ni.

2-Dampa (ST) AC hian Polling Station 41 a awm a, inthlanna tluang taka neih zawh a nih hnuah Polling Station hrang hranga EVM leh VVPAT hmanga vote tla te hi venhimna tha tak hnuaiah District Election Office, Mamit chu nimin zing dar 4:27 khan thlenkim pui niin, Vote chhiar ni, November 14, 2025-a lakchhuah turin Strong Room-ah uluk tak leh venhimna tha tak hnuaia awm turin dah luh nghal an ni.

He inthlanna a Vote tla te endikna hi Returning Officer Malsawmzuala Pisa-ah neih a ni a, he hunah hian Election Commission of India-in ruahmanna a siamsa form 17A dungzuia endikna tur (scrutiny) hi neih niin complain lut a awm loh thu leh Bawlte Polling Station-a VVPAT thlak ngai awm chu thlak a nih hnuah inthlanna tluang taka kalpui zui leh a nih thu a tarlang a ni.