MNF in Pathian hnena lawmthu sawina inkhawm nei

MNF Party chuan Dampa Bial Assembly By-election a hnehna an chan avanga Pathian hnena lawmthu sawi inkhawm nimin khan Aizawl-a Vanapa Hall-ah an buatsaih.

Nimin a lawmthu sawi Inkhawm MNF in an buatsaih ah hian MLA atana thlan thar Dr. R. Lalthangliana chuan he inthlanna a hnehna an chan hi Dr. Thangtea hnehna a ni lo tih sawiin, “Pu Zoramthanga kaihhruai MNF hnehna a ni a, chu hnehna chu Pathian vang a ni. MNF hruaitu, party mite leh Bial mipuite thawhrimna piahlamah Pathian vang liau liauva hetiang dinhmuna ding thei hi kan ni a. Pathian in chawimawina sang ber chang rawh se,” a ti a. “Inthlan ngaihsak leh ngaihven hlawh ber emaw tih hial turah, Ruling tha chakna zawng zawng nena beih nimah ila, Pathian in chakna min pe a ni. Pianpui unau ang chiaha ka en, Pu Lalrintluanga Sailo in hun lo taka min boralsan vanga he hun hi hmang kan ni a. A sulhnu ten rilru a tithar hle a ni,” a ti.

MNF Sr. Vice President ni bawk Dr. R. Lalthangliana chuan Zoramthanga kaihhruaina hnuaiah MNF chuan Zoram hmasawnna ruhrel lian leh pawimawh zawng zawngte a lo thawk tawh thin tih pawh sawiin, “Hun khirh leh thim tak tak kan lo paltlang tawh a. Pu Zoramthanga hi Pathian mi a nih vang a ni a. MNF dintuten ‘Pathian leh kan ram tan’ tia kan thupui an lo vuah chu tun thlengin Lalpa;n mal a la sawm a ni,” a ti a. “Inngaitlawma, tawngtai a, Pathian kan zawn a, kan awmdan sualte kan hawisan chuan Pathian in kan ram a tidam leh ang,” a ti bawk.

He hunah hian MNF President Zoramthanga pawhin, “MNF in kan duhtawk ni lovin, Pathian in a duhtawk min pe thin,” tiin Pathian hnenah lawmthu an sawi a. Dampa bial by-election a party zawng zawng campaign-a chhuakte accident laka veng tura an tawngtaina chu Pathian in min chhang tih sawiin, “A lawmawm takzet a ni,” a ti a. Dampa bial-a ZPM candidate chak lohna chu ZPM party chaklohna leh Chief Minister chak lohna nia sawiin, “Bana kaih policy hnawlna a ni. Hei hi Pu Rama sawi nilovin, Pu Duha sawi a ni. Article 371 (G) hrechiang ber anga inchhal hian, a pawilai ber kan ram himna leh neihtu kan nihna hralh a, hriat ringawt a lo tawklo a. A thlaraua chian angai a ni. Chuvangin, Ephraim ngawpui indonaa Absaloma a tlawm ang khan, Pathian duhloh zawng titute nen kan indo a tul dawn a. Thlamuang leh chhel takin i awm ang u. ‘Pathian leh kan ram tan’ kan tih hi Pathian in mal a sawm ang,” a ti bawk.

Nimin-a he hun hman hi MNF Vice President Vanlalzawma chuan kaihruaiin MLA boralta Lalrintluanga Sailo nupui, Lalbiakthuami pawhin thu a sawi a, Pathian hnena lawmthu sawi tawngtai rualna hun hman a nih hnuah MNF Treasurer Lalruatkima chuan lawmthu sawina hun a hmang a ni.