Inhmuhchhuah nan Lalpa’n malsawm se duh

Dampa Bial Assembly by-election neih zawh taka ZPM Candidate Vanlalsailova chuan an chak lohna chu an inhmuhchhuah nan Lalpa’n malsawm se a duh thu a sawi.

Nimin-a ZPM in an Party Office-a Chhung Inkhawm an neih ah Vanlalsailova chuan by-election neih zawh taka an tlin zawh loh avanga ngaihdam dilna leh hriatthiam ngenna thu sawi a ngaih tak thu sawiin, “Kan chak loh avanga tute emaw mawhpuh kual tur ka zawng lova, a chhan bul ber chu keimah ka ni tih ka pawm thlap a ni,” tiin “He chak lohna hi kan inhmuhchhuah nan Lalpa’n malsawm se ka duh a, politics-a kan hlawhchhamna hian Pathian hmel a tibal tur a ni lo tih hi ka duh dan a ni,” a ti a. “Kum 2023 inthlanpuia kalphung thar mipui sawrkar kan din theihna tura a thli tlehtirtute zinga hmanruaah Pathian in min hmang ve a; mahse, inthlanah ka tling zo ta lo. By-election ah ka tling lo leh ta a, a tuartu leh hrehawm ti ber chu keimah ka nih ka ring. Mahse, ZPM hian kan thil tum kan tihhlawhtlinna turin tuna ka dinhmun hi darthlalang atan a rawn hungah ka ngai a, theihtawp chhuahin he ram tan hian hma kan la zel ang,” a ti bawk.

He hunah hian ZPM President Lalliansawta pawhin chak tura inngai an chak lo tih sawiin, “Kan chak loh dan kha ka ngaihtuah a, mawng sawh dawta tla chu kan ni lo. Polling Station 41-a 20-ah kan sang zawk a. MNF khan 18-ah chakna an nei a. Hmun pakhat-ah kan inhnehtawk a, a vote number-a chhut a nih avangin kan tla a ni mai. Chuvangin, kan hneh lo lem lo a ni,” a ti a. Chak loh tak chuan puhmawh tur a awm nual thin tih pawh sawiin, “Puh tur a awm a nih chuan Party President hian mawh ka phur a ni. By-election ah hian kan campaigner-ten theihtawp an chhuah a, kan Minister leh MLA-te pawh an tang takzet a, ZPM min vote-tu zawng zawng chungah lawmthu kan sawi a ni,” a ti bawk.