MNF in Chief Minister lakah thubuai an thehlut
MNF Legal Board chuan Chief Minister Lalduhoma chu Silsury khuaa Dampa Bial by-election atana a Campaign-na ah hnam leh hnam inkara inhuatna thlen thei thu sawi ah leh Model Code of Conduct bawhchhia a puhin Mizoram Chief Electoral officer (CEO) hnenah thubuai an thehlut.
Nimin-a Aizawl Press Club-a thuthar thehdarhtute an kawmna ah MNF Legal Board Member Saihmingliana Sailo chuan tun thla November ni 1-a Chief Minister Lalduhoma’n ZPM Party tana Silsury khuaa a campaign-naah MCC leh Dan dinglaite nasa takin a bawhchhia nia sawiin, “Hemi tum hian Chief Minister chuan a thusawi bul tanna ah ‘Kan hruaitu hmasaten Mizo mipuite leh Chakma inkarah inhuatna chi an lo tuh a, hruaitu hmasa ten Chakma huat dan min lo zirtir tawh thin a ni’ tih a sawi a, chu chu duh tawk mai lovin, Chief Minister hmasa Pu Zoramthanga thusawi ni awm takte tarlangin, Chakma-te fuihpawrh tumin thu mak tak tak a sawi chhunzawm a, kan ram hruaitu lu berin, Election kaihhnawiha dan dinglai ( Representation of Peoples Act.1951 & Model Code of Conduct) te hrereng chunga tun Dampa Constituency atana By-election neih tura a awmna party chakpui a duh luat vanga hnam tlem zawk, Chakma-te hnena a chipui Mizote leh ram hruaitu hmasate a chhe thei ang bera a zuk hek duh mai hi a pawi kan tiin demawm kan ti takzet a ni,” an ti.MNF Legal Board chuan Chief Minister thusawi hian Election kaihhnawiha dan dinglai Representation of Peoples Act.1951 hnuaia “Party tumahin hnam leh hnam emaw chi leh chi emaw, sakhuana emaw, inkara in huatna emaw, innghirnghona lam kaihhnawih engmah hmalakna lam hawi an ti emaw, an sawi emaw tur a ni lo,” tih chu chiang takin a bawhchhia niin an sawi a. Hei bakah hian hemi ni vek hian Chief Minister chuan mipuite chu an party candidate an vote loh chuan sawrkar atanga hamthatna an hmuh tur hrekah a vau bakah hamthatna chi hrang hrangte tiamin Silsury kawng siamna tur cheng vbc. 100 leh nuai 40 dahfel a nih tawh thu leh kawng tha siamsak an nih tur thu bakah, kawngpui, Border Trade, Chief Minister’s Special Package, mirethei In sak tanpuina leh an mamawh dangte pek an ni dawn tih a sawi bawk niin an sawi a. Heng a thusawi te hian Election Commission of India in a duan, Model Code of Conduct Para VII 6 (a) & (c) te chiang takin a kalh niin an sawi.
MNF Legal Board chuan RP Act leh Model Code of Conduct a bawhchhiat avangin Chief Minister Lalduhoma chu Representation of the People Act, 1951 Section 123 (3-A) in Corrupt Practices tia tarlan Section 125 anga kum 3 thleng Lung In tantir leh pawisa chawitira hrem theih a nih thu sawiin, CEO hnenah hian hmala tura ngenna/complaint an thehlut tih an sawi a ni.