Court in NHIDCL leh M/s J. Infratech Ltd. te an kawng siam Thlalak Affidavit hmanga thehlut turin a ti

Gauhati High Court, Aizawl Bench-a Chief Justice (Gauhati High Court) Ashutosh Kumar leh Justice Michael Zothankhuma-te thutna Bench chuan Kawnpui leh Sairang inkar kawngpui dinhmun tha lo chungchangah NHIDCL leh M/s J. Infratech Ltd. te chu an kawng siam Thlalak Affidavit hmanga Court-a thehluh turin a ti. 

Gauhati High Court, Aizawl Bench-a Chief Justice (Gauhati High Court) Ashutosh Kumar leh Justice Michael Zothankhuma-te thutna Bench hian Kawnpui leh Sairang inkar kawngpui dinhmun tha lo tak chungchanga Mizoram Truck Drivers’ Association (MTDA)-in PIL an thehluh chu nimin khan a ngaihtuah a, October 24, 2025-a Court in thupek a lo siam tawh angin NHIDCL chuan an insawifiahna thehlutin Kawnpui leh Khamrang (118 to 130 kms) inkar chu July 2025 khan PWD kut atanga an lak thu an sawi a. Bilkhawthlir to Kolasib (70-95 Kms), Kawnpui to Khamrang (118-133 Kms) leh Buichali to Sairang (147.8-159 Kms) kawng inkarte chu siam that hna lo thawk lailawk (short term maintenance work) turin M/s. J. Infratech Ltd chu June ni 4, 2025 khan NHIDCL chuan an ti a. Hemi hna lo thawh lailawk tura Work Order chu July ni 7. 2025 khan NHIDCL hian M/s J. Infratech hnenah tihchhuah a ni a. NHIDCL leh M/s. J. Infratech Ltd te chu kawng khuar hnawhkhah te, leimin leh tui luankawr thenfaite, lungrem te leh a dangte siam hna thawk turin an ti a. Ruahsur nasat leh motor veivak an tam avangin hna hi thawh chak theih a ni lo tiin Court chu an hriattir a. NHIDCL insawifiahna chu Court hian thu tlingah pawm lovin, kawng siam ngei a nih tihchian nan kawng siam thlalak chu Affidavit hmanga thehlut turin a ti a ni.

M/s. J. Infratech Ltd. chu Court hmaa inlan tura hriattir ni mah se an inlan lova. Court chuan a lungawi loh thu sawiin, M/s. J. Infratech Ltd. chu an hnathawh chin bakah an hnathawh thlalak kimchang nena Affidavit hmanga Court hriattir turin a ti a. Court hmaa an inlan lo nawn leh a nih chuan he kawngpui hi Mizoram tana a pawimawh em avangin Court a in lang turin Warrant of Arrest chhuah thlengin an ngaihtuah ang tih a sawi a ni.

Court-a he thubuai thehluttu chuan tunhnaia kawngpui dinhmun chhe tak avangin nunna chan an awm tawh thu Court an hriattir a, Court chuan thil awmdan ah a lungawi loh thu sawiin, he thubuai hi November ni 25, 2025-a ngaihtuah leh turin a ruat a ni.

He thubuai ah hian thubuai thehluhtu lam tan Emily Chhangte a ding a. NHIDCL aiawhin Samuel Vanlalhriata dingin Vanneihsiami chu sawrkar tan a ding bawk a ni.