MGNREGA-a thawktute hlawh la lo pawi tih thu sawi

Rural Development & Administration Department (RD&AD) changtu Minister Prof. Lalnilawma chuan MGNREGA hnuaia thawktu ten hlawh a huna an la lo chu pawi a tih thu a sawi.

Rural Development & Administration Department (RD&AD) hnuaia Scheme hrang hranga hmalakna thlirletna hun nimin-a Aijal Club-a neih a hmanpuina ah RD&AD Minister Prof. Lalnilawma chuan MGNREGA hnuaia thawktuten hlawh a huna an la lo chu pawi a tih thu sawiin, sum awm reng mah se Technical problem vangin an hlawh pekchhuah a la nih theih loh thu a tarlang a. Hlawh an lak vat theih nan hma an lak mek thu a sawi bawk. Hei bakah hian The Mizoram (Village Councils) Act, 2025 chuan thingtlang khaw hrang hrangte tih hmasawnna kawnga hmalatu tur Village Development Committee din ni se a tih angin Committee din a nih tur thu leh hmasawnna nasa tak a thlen a beisei thu a sawi a ni.

Hei bakah hian Minister chuan RD&AD hnuaia peng hrang hrangte chu an thawkho tha a tih thu leh RD&AD chu thingtlang mite innghahna ber leh khawtlang tih hmasawnna tur thil tangkai hrang hrang siamtu a nih avangin chak taka hnathawh zel a pawimawh thu a sawi a. Field Level-a thawktute pawhin an hna dik taka an thawh a pawimawh thu sawiin, District Level-ah pawh Review Meeting neih thin nise, hnathawh endik leh hmalak dan hrang hrang inzirtawn nan tha a tih thu a sawi bawk.

RD&AD-a Commissioner & Secretary R. Zarzosanga kaihhruai he hunah hian RD&AD Secretariat, RD Directorate, SIRD&PR, MzSRLM, LA Directorate leh Social Audit atangte in presentation thlirho a ni a. Hna thawh tawhte endik niin, tha zawka hmalak dan tur leh thawhho zel dan turte sawiho a ni a. Tun dinhmunah hian MGNREGA hnuaiah Job Card 2,12,043 pek chhuah tawh niin Active Job Card 2,10,574 (99.30%) a awm a. Workers 2,37,079 awmin Active Workers 2,10,900 (88.95%) an awm a. Active Job Card leh Active Workers awm zatah Mizoram chu a titha pawl a ni a. FY 2025-26 atan tun thleng hian person days 51.59% zawh tawh a ni a. Ni 8 chhunga hlawh pekchhuah zat 92.42% niin, hetah pawh hian Mizoram chu a titha pawl a ni a. Aadhaar based payment system (ABPS) pawh tha taka kalpui niin, District 3 – Hnahthial, Khawzawl leh Lawngtlai-ah te 100% a kalpui a ni. Nimin-a thlirletna hunah hian District hrang hranga Project Director-te, BDO-te leh Officials dangte an tel a ni.