Mizo Territorial Army lak tur atan inbuatsaih mek zel

Mizoram-a Territorial Army (Home & Hearth)-a tang tur lakna November ni 15, 2025 atanga November ni 25 inkara neih turah Mizoram District hrang hrangah thlalaite ngawh takin an inbuatsaih mek.

Territorial Army lakna hi tun thla ni 15 atang khian Aizawl Mualpui-a Rajiv Gandhi Stadium-ah neih a ni dawn a, hemi atana Pre-Recruitment Training Aizawl leh Lunglei-ah Mizoram Youth Commission leh 166 Infantry Bn (TA) (Home & Heart), Assam chuan an buatsaih mek a, ngawrh taka training niin Territorial Army atan hian post 144 General Duty lak turah post 9 chu hmechhiate tana hauhsak a ni.

Tun tuma Territorial Army lakna neih turah hian Nov. 15 leh 16-ah Aizawl District tan intlar theih a ni anga, District hrang hrang tan a indawt-a nei chho zelin November 18-ah Serchhip leh Mamit District tan intlar theih a ni dawn a, Hmeichhia te tan November 22 leh 23-ah intlar theih a ni dawn bawk a. Form chu a hmun (Rajiv Gandhi stadium)-ah fill up tur a ni ang.

Mizo Territorial Army (MTA) atan hian kum 18 - 42 tan dil theih a ni dawn a, thiamna lamah Class X/HSLC-ah mark zaa 45 hmu chin tan dil theih a ni a. Mipa tan san zawngah 157cm niin kg. 50 chin chunglam nih a ngai a, hmeichhe tan 152cm chin niin rih zawng ah kum leh san zawng in mil tawk a ni tur a ni bawk.

Intlar duhte tan Birth Certificate; Education Certificate; Domicile Certificate; Passport size photo color (20 copies); Pan Card leh Aadhar Card; Tribal Certificate (A diltu thlalak chuanna); Religion Certificate (SDO (Civil/Sadar) atanga lak); Character Certificate (a diltu thlak chuang LC/VC/Police Station atanga lak thar); Married/Unmarried Certificate (LC/VC atanga lak); Sports Certificate (National/State Sports Authority in an pekchhuah, 4 na chin) te Original leh Xerox copy 2 theuh ken tur a ni ang.