Hmeichhiate chunga hleilenna thleng thin tihbo kawnga hmalakna tur Project hawn a ni

Hmeichhiate chunga hleilenna thleng thin tihbo kawnga hmalakna tur, Gender Based Violence (GBV) Solve Project chu nimin khan Social Welfare, Women and Child Development Department changtu Minister Lalrinpuii chuan a hawng.

Aparajita leh J-PAL South Asia tangkawp buatsaiha kalpui tur Gender Based Violence (GBV) Solve Project hi Mizoram-ah chuan Mission Foundation Movement (MFM)-in a kalpui dawn a, GBV Solve Project atan hian proposal 470 chuang lutin, tehna hrang hrang hmanga an thlitfim hnuah India rama Organization 6 te chu he project khawih tur hian an thlangchhuak a. Heng zingah hian Mission Foundation Movement (MFM) hi telin MFM hian Aizawl District-a hmeichhiate chunga hleilenna thleng thin tihbo nan mahni invenna, mipui hrilhhriatna leh a tuartute enkawl kawngah WCD nen tangkawpin hma a la dawn a ni.

Gender Based Violence (GBV) Solve Project hawnna a Pisa a neih ah Social Welfare Minister Lalrinpuii chuan Mizoram-a hmeichhe chunga hleilenna pun nasatzia tarlangin, kum 2022-2023 chhung khan Women Helpline-ah case 3094 report a awm a, February 2025-ah chuan case 12,750-ah a sang chho tih a sawi a. GBV tihbo lama hmalakna chu kan ramin a mamawh takzet tih sawiin, hmeichhe dinhmun a that chuan chhungkua a thang a, khawtlang pawhin hma a sawn thin tih a sawi bawk a. GBV Solve Project chuan hmeichhe chunga hleihlenna chungchang ringawt bitum lovin naupang (mipa leh hmeichhia) ten hemi chungchang zirtirna nasa tak an dawn dawn thu leh, hmeichhe chawmdawl ngaite eizawnna tlak khawpa thiamthil zirtirna a keng tel dawn tih a sawi bawk.