Mizo Hnam lam tih bawrhban ah ngaihdam dil phut angin ngaihdam dil a ni

Mizo Zirlai Pawl (MZP) chuan Mizo Hnam Lam (Cheraw) ti bawrh-bang zawnga hmalatute chuan Mizo mipuite hmaah ngaihdam an dil ngei an phut thu an sawi.

Inrinni khan Social Media lamah Mizo Hnam Lam (Cheraw) kaihlek chu mawi lo taka phochhuah a ni a, hemi chungchanga bultumtu nia an ngaih Red Bull mi leh sa te chu MZP hian Aizawl-a an Pisa-ah koin thil awmziah an sawipui a ni. MZP hruaitu ten an sawi danin he huna tel Red Bull aiawhte chuan Mizo Hnam Lam mawi lo taka kaihlek a ni chu pawi an tih thu sawiin, he thila a mawhphurtu ber chu Contract an ziahpui zinga mi Content Creator pakhat, Yashwi Arora, Producer Red Bull India, a nih thu an sawi a. Yashwi Arora hian Inrinni khan Mizoram chhuahsan tawhin Mizoram a chhuahsan hnu hian  lehkha ziakin Mizoram mipuite laka thupha a chawina hi MZP kaltlangin a rawn thawn a ni.

MZP chuan Mizo Hnam Lam ti bawrhbang zawnga hma latu Yashwi Arora chuan Mizo mipuite hmaah ngaihdam a dil ngei an phut tlat thu sawiin, ngaihdam a dil lo a nih chuan a tawp thlenga umzui an tum thu an sawi a. Red Bull Team te chuan MZP duh dan anga Mizo mipuite hmaa ngaihdam a dil ngei theihna turin Yashwi Arora hi an lo biak tur thu leh mawh an lo phurh tur thu an sawi bawk a ni. MZP chuan Mizo Hnam ziarang (culture) ti bawrhbang zawng leh ti hmelhem zawnga chet lakna thleng nawn tawh lo se an duh thu pawh sawiin, Hnam Lam kan entir duh a nih pawhin uchuak tak ni lovin, Mizo mipui ten kan hriat dan, Hnam Lam dan dik-a Lam entir turin Mizo mipuite an chah a. Tuna Video darh pawh hi tidarh chhunzawm tawh lova paih hram hram turin an ngen bawk a ni.

Hetih lai hian Art & Culture Department pawhin thuchhuah siam nghalin Cheraw kân lai dik lo tak maia Aizawl Veng pakhata entir a ni chu pawi an tih thu an sawi a. Hnam Lâm hi a tibawrhbang zawng leh a zahawmna tihmelhem zawnga entir an phal lo tih mipuite an chah nawn bawk a ni. 

Mizo Cultural Organisation (MCO) leh Mizo Culture Artists' pawhin thuchhuah siamin tute emaw programme buatsaiha Mizo Hnam Lam mawi lo taka entir a ni leh a video a darh vak mai chu an ngaimawhin an duh lo hle tih an sawi a. Mizo Hnam Lâm chi hrang hrangte chu Hnam rohlu a ni a, chawinuna tihlar zel an duh thu an sawi a, a hmasawn zawng ni lova hetianga uchuak taka lantir a ni chu an dem tih sawiin, hetiang zawng hian tumah che tawh lo se an duh thu leh hma lak theihna chinah chuan na takin hma an la dawn tih an sawi bawk a. Mizo mipuite chu kan ram leh hnam, kan Culture te vawnghim tura hma latu ni theuh turin an ngen tih an sawi bawk.