Dampa Bial by-election atan inbuatsaihna peihfelin nimin khan Inthlan ni-a Duty turte an chhuak tan

Dampa Bial-a Assembly by-election neih tur atana inbuatsaihna chuan a vawrtawp a thleng chho mek a, nimin khan Polling Party te pawhin an Duty-na tur hmun pan tanin Vawiin hian Polling Party te hi chhuak kim tura ruahman a ni a, naktuk zing dar 7:00 atangin Vote thlak tan a ni ang.

Naktuk November 11, 2025 hian Dampa Bial Assembly Seat ruak hnawhkhat turin mipui ten Vote an thlak dawn a, Inthlanna-a Vote thlak turte buaipuitu tur Polling Party te tana Training hnuhnung ber chu Inrinni khan neih niin Duty turte bungraw ken turte pawh enfiah nghal a ni a, Polling Station hla zual-a duty tur Polling Party 6 te chuan nimin zing dar 9:00 khan an Duty-na tur hmun panin Mamit an chhuahsan a, heng Polling Station te hi Silsuri-I, Silsuri-II leh Silsuri-III bakah Zopui, Hnahva leh Lianbuang-a duty turte niin lirthei 18 hmangin an chhuak a ni.

Dampa Bial-ah hian Polling Station 41 awmin chung zinga Polling Station 3- Silsuri-I, Silsuri-II leh Silsuri-III te chu Critical Polling Station niin Zopui Polling Station chu ke a kal ngai a ni bawk a. Polling Party dang zawng te chuan Vawiin hian an duty-na tur hmun an pan ve leh dawn a, Vawiin hian Polling Station dang 35 a duty turte chu lirthei 39 hmangin an kal ve leh dawn a ni.

Jt. CEO Ethel Rothangpuii chuan Polling Station 41 zinga 40-ah hian webcasting tih vek a ni dawn tih sawiin, ke chauhva thlen theih Zopui Polling Station-ah hian electric a la luh loh avangin inthlan vote thlak lai hi webcasting a tih ve theih dawn loh a, hei vang hian Video Camera hmanga thlalak a ni dawn a ni.

Dampa Bial-a Assembly by-election lo awm turah hian National party 2- BJC leh INC, State party 2 - MNF leh ZPM bakah Un-recognised Register party MPC te'n inthlan hi an chuh a, Dampa Bial-ah hian hmeichhia vote nei mi 10,185 leh mipa vote nei mi 10,605, an vaiin vote nei mi 20790 awmin naktuk zing dar 7:00 atanga tlai dar 4:00 thlengin Vote thlak a ni ang.