Lehkhabu chhiar kan uar leh tan tawh tih sawi

School Education Minister Dr. Vanlalthlana chuan Mizote kan thangharh tan tawh nia sawiin, “Lehkhabu chhiar kan uar chho tan leh tawh,” a ti.

Govt. Hrangbana College Department of Mizo-a Assistant Professor Rohmingthanga Ralte ziak ‘Kawihthuang’ (Literary Criticism) nimin-a a tlang- zarhna ah Education Minister Dr. Vanlalthlana chuan Pathian hian kan thinlungah engemaw tak a dah vek tih sawiin, “Kan huaisenna leh taimakna nen kan pholan a ngai a. Tunlai hian AI in min run mek a, kan nun pawh a khawih danglam nasa dawn a ni. Amaherawhchu, Literature lam a inhmang te erawh a khawih buai thei dawn lova, an hlu tual tual dawn a ni,” a ti a. Mizote kan thangharh tan tawh tih sawiin, “Lehkhabu chhiar kan uar chho tan leh tawh a, lehkhabu zawrh runpui-ah pawh hralh an hnem hle a ni,” a ti.

Education Minister Dr. Vanlalthlana chuan lehkhabu ziah chu a hlut thu pawh he hunah hian sawiin, “Lehkhabu chhiar pawh kawng engkima min tichaktu leh phurna min cho chhuaktu a ni a, mihring hi Pathian in pawimawhna neiin kawng hrang hrangin min siam a, midang tana thawhhlawk tak te hi lehkhabu ziaktu an ni,” a ti a. Kan hnam thil hi kan hlut thiam a ngaih thu pawh he hunah hian sawiin, “Tunah hian zirlaiten an tangkaipui tur kan zirlai bak ah hian lehkhabu tha kan lei dawn a, hemi atan hian sum tam tak a awm a ni.” tiin Literature lamah Mizote min cho chhuak leh turin lehkhabu ziaktute chu Minister chuan a ngen bawk a ni.

Aizawl-a MZP Conference Hall-a he lehkhabu tlangzarhna hun hi Pachhunga University College Mizo Department-a HoD Dr. H. Laldinmawia chuan kaihruaiin Mizo hnam tana mi thawhhlawk tak tak leh lehkhabu ziaktu thenkhat leh mi ril tak tak ten thu an sawi bawk a. He lehkhabu hi Rs. 350/- man a ni.