Chhim lamah hri leng avangin harsatna a thleng mek

Mizoram chhim lama India leh Myanmar inrina khaw thenkhat ah kawthalo hri a leng mek nia hriat a nih avangin nimin khan Siaha-ah District Bawrhsap hovin thutkhawm neih a ni.

Siaha DC Office Chamber-a thutkhawm hi Bawrhsap VL. Hruaizela chuan kaihruaiin kawthalo chu inkaichhawn awl tak anih avangin darh zel thei a nih thu a sawi a, hei vang hian mi tinte an fimkhur a, faina leh thianghlimna an ngaih pawimawh deuh deuh a ngai tih a sawi a ni.

Siaha Chief Medical Officer, Dr. Lalrengpuii Ralte chuan he hri leng dinhmun hi tarlangin, Lomasu khuaah Nov. 5, 2025-ah damlo nei tanin, Lodaw khuaah Nov. 11, 2025-ah damlo an awm tih hriat a nih thu a sawi a. Hei hi an hriat veleh Nov. 11, 2025 tlai-ah heng khaw pahnihah hian Medical Team tirh nghal niin Mara Autonomous District Council-a CEM M. Laikaw chuan Medical Team te ken tur damdawi leh mipui mamawh hrang hrang hi a tum sak a. Tun dinhmunah Lomasu khuaah damlo 14 awmin, Lodaw khuaah damlo 4 an awm mek a, mitthi pathum (3) an awm tawh bawk. Heng khaw pahniha tui leh ek sample chu Zoram Medical College & Hospital-a endik turin ruahmanna siam a ni. Mipui vantlang tan Health Advisory siam ni bawkin Joint VC Siaha District kaltlangin puanzar a ni bawk. Lomasu leh Lodaw khua hi Myanmar nena inkalpawh awlsam tak niin raltlan thahnem tak an awm bakah lirthei leh ke-a lehlanga ni tin inkalpawh thin engemaw zat an awm thu sawilan a ni bawk.

Hetihlai hian Lawngtlai District in a huam chin Kakichhuah-ah chuan niminpiah lama hri leng avanga mitthi an awm hnuah hri leng avanga nunna chan an awm belh tawh rih lo a, tun dinhmunah he hri kai ni a hriat damlo 27 awmin, Rapid Response Team din a ni a, he khua hi thutchilh mekin Medical Team ten Sample an lak te pawh ZMC&H-a enfiah tura thawn a ni tawh bawk.