Hri leng vanga thi awm belh

Lawngtlai District chhung Kakichhuah-a Tui hri leng nia hriat avangin mi 5 an thi tawh a, he hri hi Salachhuah (Myarmar) lam atanga rawn lut nia ngaih a ni.

Lawngtlai District chhim lama awm Kakichhuah khua a tunhnaia Tui hri leng nia hriat vang hian nimin zing khan Chawlithaw (14) chu a thi leh a, hemi hmalam hian he hri avang hian mi pali thi tawhin he hri leng avanga thi chu mi panga an ni ta a, an zinga pakhat hi Kakichhuah khaw mi niin Salachhuah (Myanmar) leh Kaki-chhuah a awm raltlan mi 2 ve ve an thi bawk. Heng bakah hian an District chhunga Hruitezawl khua ah damlo mi 6 an awm mek nia hriat a ni bawk a, Hruitezawl bula awm Lungdar khua (Siaha District)-ah pawh nimin zing khan mi pakhat thiin hei pawh hi hri leng vanga thi nia sawi a ni bawk.

Kakichhuah-a tui hri nia hriat lêng mek avang hian niminpiah khan Medical Team chuan Lawngtlai atangin an tlawh a, Lawngtlai-a Sr. CMO Dr. Lalmuanawma Jongte sawi danin he hri avanga damlo hi November ni 4 atang khan an awm tan a, Medical Team ten Kakichhuah an tlawh hian Investigation kalpui nghal a ni a. Tui sample lak niin, ZMC&H lamah endik mek a nih thu leh Salachhuah (Myarmar) lam atanga hri hi lo lut a an ngaih thu a sawi a. Kum 5 - 63 inkar te endik atangin tun dinhmunah he hri vei hi mi 27 awmin, thalai lamah hei kai an tam zual niin a sawi a. Sr. CMO chuan a kaihhruaina hnuaiah Rapid Response Team din tawh niin, Health Worker pakhatin a awmpui mek tih a sawi.

Nimin khan Lawngtlai Bawrhsap leh Sr. CMO te chuan hmalak dan tur an sawidun a, faina leh thianghlimna chak taka kalpui relin, hri vei te rang taka enkawl nise an ti a. Kakichhuah leh Salachhuah inkalpawhna kawng chu dan lailawk nise, Kakichhuah chu kar khat chhung atan 'Containment Area' ah puan nise, Medical duty leh pawi-mawh bik lo chu luh leh chhuah phal loh nise an ti.