PWD in hna pek leh hna thawh thalo sawifiah

Mizoram Public Works Department (PWD) chuan Mizoram sawrkar in Nidhi Creative Infrastructure Pvt. Ltd. te duhsak bikin Contract hna tam tak a pe anga tunhnaia Social Media a tarlan chu thu dik lo a nih thu an sawi a. Hnathawh zawh loh te thawh zawh tawh anga Media a tarlan thin a ni chu pawi an tih thu an sawi bawk.

Hemi chungchanga thuchhuah an siamah Mizoram PWD chuan sawrkar hmasa hun chhung (2019-2023) khan Nidhi Creative Infrastructure Pvt. Ltd. hian hna cheng vbc. 175.99 (Rs. 175.99 crore) man an lo thawk tawh tih sawiin, tun sawrkar hnuaiah hian cheng vbc. 31.15 (Rs. 31.51 crore) man an thawk leh tawh bawk niin an sawi a. “Heng hnate hi Mizoram sawrkar pek an ni lova, Ministry of Road Transport and Highways-in e- tender hmanga a pek te vek an ni. Mizoram sawrkarin mawhphurhna a nei lo,” an ti.

Mizoram PWD chuan tun Ministry hnuaiah Nidhi Creative Infrastructure Pvt. Ltd. te chu Aizawl khawpui chhung kawng Resurfacing hna leh State Emergency Operation Centre hna, a vaiin cheng vbc. 57.97 (Rs. 57.97 crore). man pek an nih thu pawh sawiin, “Heng hna te hi hna hmanhmawhthlak, Contractor nazawng thawh theih loh leh Machinery hranpa ngai a nih avanga pek an ni,” an ti bawk.

Hei bakah hian Mizoram PWD thuchhuah chuan hnathawh thalo report an dawn te reng reng chu umzui nghal zel a nih thu pawh sawiin, “Hna thawh mek, la thawh zawh loh te a thla te la a, hnathawh zawh tawh anga Media-a tarlan a ni thin erawh hi chu a pawi hle. Thu belhchian dawlte erawh chu umzui nghal zel turin PWD hi a inpeih reng a. Kawng tha leh tlo zawk nei turin theihtawp a chhuah mek reng a. Mipuite thurawn dawng tur pawhin a inhawng reng a ni,” an ti bawk.