Hnathawh tha lo ah Action lak a nih tur thu sawi

Chief Minister Lalduhoma’n ZPM Sawrkar hnuaia hnathawh hrang hrangah a chhia a awm chuan action an la dawn tih sawiin, Project Monitoring Committee in hnathawh hrang hrang an endik zel dawn tih a sawi bawk.

Nimin-a Siaha Bazar Traffic Point-a ZPM Vantlang inkhawm neih a hmanpuina ah he thu hi sawiin Chief Minister Lalduhoma chuan ZPM sawrkarna hnuaia Monitoring Committee chuan Project 40 chuang an endik tawh tih sawiin, an sawrkar hmaa hnathawh chu chhe viau mahse hnathawhna pekchhuah tawh anih avangin thlak danglam a harsa tawh niin a sawi a, an sawrkar hnuah erawh hnathawh a tha tawh dawn tih a sawi a ni.

Chief Minister chuan an sawrkar hnuah a hun taka Office kala a hun taka ban a ni tawh tih sawiin, sawrkar hnathawk te chu mipui chhiah tlingkhawm atanga hlawh nei an ni a, an sawrkar ah chuan an hnathawh hunbi te chu an vil reng a, hun bi nei a thil an kalpui tawh avangin hnathawh pawh a sawt tawh hle tih a sawi a, ZPM Sawrkar hnuaiah a hun taka hlawh lak a ni tawh tih a sawi a. Mipui te'n harsatna an tawha an zualko-na tur 'Mipui Aw Portal' pawh hawn a nih tawh thu sawiin, case tam tak hemi kaltlang hian bawhzui leh chinfel tawh a nih thu a sawi a, mipuite chu Mipui Aw portal hmang tangkai turin a chah bawk.

Nimin-a he hun hmanna ah hian ZPM Leader Lalduhoma hian an partyn zawm thar mi 1342 a lawmlut a, ZPM Leader in a lawmluh zingah hian MDC ni lai pathum an tel a, heng te hi Saikao Bialtu Beihruakhai, Siaha North-II Bialtu M. Manasia leh Siaha East-II Bialtu HC. Biakcheuva te an ni.