Dampa Bial-a by-election Campaign in a vawrtawp a thleng chho tan mek

Karleh Thawhlehni-a Dampa bial-a Assembly By-election lo awm tur atan Party hrang hrangin Campaign beihpui an thlak chhunzawm mek a, Campaign hian a vawrtawp a thleng chho tan mek a ni.

Union Minister of State George Kurian chuan Dampa bye-election lo awm tura BJP Candidate tana campaign turin nimin khan Mizoram a lo thleng a, Lengpui tumhmun atangin Darlung a pan nghal a, Dampa bial-a a lo Campaign chhan chu hmasawnna an hmuh ve theihna tur atan a nih thu sawiin, BJP in an thupui ber chu hmasawnna a nih avangin Mizoram chu State hmasawn nih theihna kawng tha tak an tan a inhawng tih a sawi a, Darlung an rawn thlen nan kawngpui zim leh chhe tak an paltlang tih sawiin, State Sawrkarin a ngaihthah zia a hmuhin lungchhiat thlak a tih thu a sawi a. Dampa Bial chuan kawngpui tha tak an mamawh a, kuthnathawktute tan Link Road te an mamawh tih sawiin, Lalhmingthanga an thlang tling a nih chuan an pe dawn niin a sawi a ni.

MNF Candidate Dr. R. Lalthangliana chu nimin khan West Lungdar, Chungtlang, Rulpuihlim, Reiek leh Ailawng khua ah kalin an Party zawm thar mi engemaw zat a lawm lut a. MNF Candidate chuan enchhin boruak a reh tawh nia sawiin, rawng Eng chu a dal tial tial a, a pawl rawng a tak tial tial tih niin a sawi a, thlantlin a nih chuan zirna In leh nu leh pa rûm mekna thalai ruihhlo ngaite chhanchhuak turin NGO leh Kohhranho nen tangkawpin theihtawpa hmalak a ni dawn tih a sawi.

MPCC President Pu Lal Thanzara pawhin West Phaileng-a Congress Worker ten infuihtharna hun an buatsaih a hmanpui a, Lal Thanzara chuan Mizoram Chief Minister Lalduhoma’n Silisuri khuaa a campaign-na ah Chakma vote duh avangin chi leh chi inhuatna lam rawngkaiin thu an sawi nia sawiin, Chief Minister in Chakma te fuihpawrh zawnga thu a sawi chu pawi an tih thu a sawi a, Mizoram-ah Congress an sawrkar loh chuan mipui te tawrhna a thleng thin tih sawiin, Mizoram mamawh ber chu Congress sawrkar tir leh a ni tih a sawi bawk.

ZPM pawhin Adviser to CM (Finance) TBC. Lalvenchhunga hovin Campaign an nei mek a, State sawrkar pawmpuina tellovin State chhunga hmasawnna hnathawh sawrkar laipuiin a sanction ngailo tih sawiin, By-Election Campaign-na ah eptu party ten State sawrkar thlawh khumin Bial chhungah Central atangin Development Project huilut thei angin an insawi chu thu belhchian dawllo a nih thu leh ZPM sawrkar hriatpuina zel a ngaih thu a sawi bawk.