Hnahthial DC Office-ah Revenue Office hawn a ni

Land Revenue & Settlement Department changtu Minister B. Lalchhanzova chuan nimin khan Hnahthial Deputy Commissioner Office-ah Revenue Office a hawng.

Hnahthial-a Revenue Office hawnna ah hian Revenue Minister chuan Hnahthial District-ah Revenue Office hawn a ni thei ta chu hmasawnna ropui tak a nih thu sawiin, mipui tam takin Revenue Department an sawiselna pakhat, dawr nuam lo an tih thinna chu hriain tunah chuan khami kawngah nasa takin hma an sawn tawh thu a sawi a. Dawr nuam tak Department an nih zel theih nan tan an lak thu a sawi bawk. Hnahthial tan Revenue Quarters sak mek a nih thu Minister chuan sawiin, Vairengte-ah te pawh Pilot Project angin Special deuh hleka ruahmanna an siam mek thu a tarlang a. Online File Tracking System, mahni awm hmun atanga File thlen chin hriat theihna tur chu bawhzui mek niin hei hian File hup bo, File tang leh tih bo tam lutuk a tihreh an beisei thu a sawi a ni.

Revenue Minister chuan an hmachhawp lian tak pakhat chu Licensed Surveyor neih a nih thu pawh sawiin, chung Licensed Surveyor-te chu ram teh leh a tul apiangah rate mumal tak nena chhawr an nih tur thu a tarlang a. Heng Licensed Surveyor leh Empanneled firm 13 an chhawr mekte chuan indaihlohna tam tak an phuhruk a beisei thu a sawi a. Hei bakah hian mipui dawrtute tan Customer Care Policy an duan mek thu leh chutih rual chuan mipuite pawh thawktute ngaichang thiama,tul lova tibuai chhen thin lo turin a chah bawk.

Hnahthial-a Revenue Office tan hian Post 7 ruahman niin tunah hian Post 4- Surveyor-I Surveyor, LDC leh Revenue Assistance Post pakhat theuh hnawhkhah a ni a, Addl. DC  Zothan-mawia Khiangte chuan Settlement Officer (SO) mawhphurhna a la dawn a ni. Nimin-a he hun hman hi Bawrhsap K. Vanlalruati chuan a kaihruai a ni.