‘Angikaar Campaign’ khar

Urban Development & Poverty Alleviation Department huaihawtin ‘Angikaar Campaign’ kharna chu nimin khan Aizawl Lammual-ah neih a ni.

He Campaign kharna hun hi UD&PA Director Jacob Lalawmpuia chuan kaihruaiin Angikaar Campaign chungchang a sawifiah a, PMAY-U hnuaia Insak mekte sak zawh thuai te, Geo-tagging hmanga Insak endikte leh tanpuina dawng tur ten pawisa an dawn zung zung theih nan he Campaign hmang hian beihpui thlak mek a nih thu a sawi a, thahnemngai lehzuala kalpui zel tur a nih thu a sawi bawk.

He hun hi Aizawl Bawrhsap Er. Lalhriat-puia chuan khuallian nia hmanpuiin kum 2047-a ram changkang ‘Vikshit Bharat’ (Developed India) dinhmun thleng tur chuan mi tinin chenna In tha an neih theuh a pawimawh thu leh chumi ti hlawhtling tura sawrkar laipui scheme PMAY-U Housing for All chu Mizorama tha taka kum 2016 atanga kalpui a ni chu lawmawm a tih thu a sawi a. Rinkson Entertainment siam PMAY-Urban Awareness video leh Faith Pictures siam PMAY-U Mission documentary-te a tlangzarh nghal bawk.

He hunah hian ‘State Level Best House Construction’ lawmman sem niin Liandailova, Champhai; Lalfamkima, Saitual leh Lalrengpuia, Khawzawl ten dawngin Painting Competition on PMAY-U lawmman sem nghal a ni bawk.