‘I Kawtkaiah Sawrkar’ kalpui chhunzawm zel a ni

Lunglei District Bawrhsap Pisa bultuma mipuite'n sawrkar hmalakna hrang hrangte an chhawr tangkai theih nan an khuaa kalchilha service hrang hrang chhawpchhuah sakna, ‘I Kawtkaiah Sawrkar’ (Prashasan Gaon Ki Ore) thawh hnihna chu kalpui chhunzawm zel niin tunkar Thawhlehni khan Bunghmun leh a chhehvel khaw mipuite tan Bunghmun BDO Office Complex-ah buatsaih leh a ni a. He hunah hian Deputy Commissioner, Election, BDO Bunghmun, Agriculture, AH & Veterinary, Health & Family Welfare leh Department/Office hrang hrang te'n Stall hawngin awlsam zawka mipuite dawr theih turin an inphochhuak a. Aadhaar siam that/siam thar, Voter ID siam that, Income/Tribal/Residential Certificate pekchhuah, sawrkar Scheme hrang hranga inziahluh, mihring leh ran hriselna dinhmun endikna, mipui hriat tur pawimawh inzirtirna leh mipuiin harsatna an thlenna hun te buatsaih niin heng service hrang hrang chhawpchhuahte hi mi 453-in an chhawr tangkai a ni.